Хаклă ентешсем! Красноармейски районĕн çĕнĕ энциклопедине кăларас ĕç пуçăнчĕ. Çакă калама çук пысăк та яваплă ĕç. Ку таранччен эпир Трак тăрăхĕн историйĕпе тата унăн паллă çыннисемпе çыхăннă "Трак ен” (2000 ç.) тата "Красноармейский район. Люди и судьбы” кĕнекесем кăларнă-ха. Анчах вĕсем çĕнĕ энциклопедин пĕр пайĕ çеç пулса тăраççĕ. Пысăк кăларăма кăларма пысăк та çĕнĕ вăй кирлĕ. Ку хутĕнче пире Шупашкарти "Трак ен” ентешлĕх те пулăшу кÿме шантарать. 
Чăваш халăхĕн ырă йăла пур: вăл кирек епле йывăр ĕçе нимелле — халăхпа пĕрле кар пуçтарăнса тума хăнăхнă. Эпир районăн çĕнĕ энциклопедине кун çути кăтартма та çак йĕркепе йĕркелесе ямалла тесе шутлатпăр. Чăвашсен "Пĕччен хулă хуçăлать”, "Пĕччен сурать типсе пырать, халăх сурать кÿлĕ тăвать” текен каларăшсем пур. Энциклопеди материалĕсене пухассине, пирĕн шутпа, пĕр ял тăрăхĕн пуçлăхĕ çине хуни çеç çителĕксĕр. Эпир çак ĕçе çÿлерех асăннă кăларăмсене кăларма хутшăннисене, тавра пĕлÿçĕсене, вăрçăпа педагогика, партипе совет ĕçĕн ветеранĕсене, шкулсенче вĕрентекенсене, библиотека ĕçченĕсене, культурăпа суту-илÿ, сывлăха сыхлас тата право йĕркине çирĕплетес ĕçре тăрăшакансене, ытти пултарулăх çыннисене явăçтарма ыйтатпăр, чĕнсе калатпăр. 
Трак енти энциклопедине кĕме тивĕçлĕ пĕр çын та, археологи, историпе культура палăкĕ те, çырма-çатра ячĕ те, колхоз-совхоз историйĕ те унта кĕмесĕр ан юлтăр. Пухăннă мĕн пур материалсене Красноармейскинчи историпе краеведени халăх музейне пырса пама ыйтатпăр. Пирĕнтен кашни хастар вăй хунипе энциклопедине палăртнă вăхăт тĕлне ентешсем патне çитерме май килĕ. 
Районăн çĕнĕ энциклопедине кăларас тĕлĕшпе туса хунă ĕçлев ушкăнĕ.