ЧР Министрсен Кабинечĕн иртнĕ ларăвĕнче «Хыпар» Издательство çуртне тÿррĕнех пырса тивекен ыйту та пулчĕ. Информполитика министрĕ Михаил Анисимов Красноармейски районĕн «Ял пурнăçĕ» тата Сĕнтĕрвăрри районĕн «Пирĕн сăмах» хаçачĕсен редакцийĕсене «Хыпарпа» пĕрлештересси çинчен пĕлтерчĕ. Çакă тиражĕпе пĕчĕк «районкăсене» финанс тата кадрсен енĕпе пулăшма кирлĕ утăм. Бюджет укçипе усă курасси тухăçлăрах пулать мĕн. Вырăнсенчи журналистсем хăйсен районĕсенчех ĕçлĕç, анчах райхаçатсен редакцийĕсен управлени функцийĕ пулмасть - ку тивĕç Шупашкара куçĕ.