Районти "Ял пурнăçĕ” хаçатăн вулаканĕсем палăртакан "Çулталăк çынни” ята 2013 çул кăтартăвĕсемпе акционерсен хупă "ТУС” обществин генеральнăй директорĕ Николай Федорович Угаслов тивĕçрĕ.
Николай Федоровича пирĕн районта пĕлмен çын çук ĕнтĕ. Шăпах вăл ертсе пынипе Красноармейски çывăхĕнче 2013 çулхи июнĕн 20-мĕшĕнче строительство керамикин "КЕТРА” завочĕ хута кайрĕ. Обăекта икĕ çултан та сахалрах вăхăтра туса пĕтернĕ. Халĕ кунта çулталăкра 60 миллион штук пиччĕн керамика кирпĕчĕ тата хушма майпа пысăк технологиллĕ керамика туса кăлараççĕ.
Н .Ф. Угаслов 1952 çулхи февралĕн 8-мĕшĕнче Тутар Республикинчи Çĕпрел районĕнчи Хула Çырма ялĕнче çуралнă. Шупашкарти строительство техникумĕнчен тата И. Н. Ульянов ячĕллĕ Чăваш патшалăх университетĕнчен вĕренсе тухнă. Каменщик, монтажник, прораб, тĕп инженер, СМУ-102 пуçлăхĕ пулса, строитель ĕçне тĕпĕ-йĕрĕпе пĕлсе çитнĕ. 2001 çулта ăна "ТУС” обществăн пуçлăхне суйланă. Çавăнтанпах ку яваплă ĕçре. Вăл — ЧР Патшалăх Канашĕн депутачĕ.
Николай Федорович тăван республикăн культура аталанăвĕшĕн, унăн çыннисен ăс-хакăл пуянлăхĕшĕн, чăвашлăхшăн çуннине шута илсе ăна Чăваш Наци Конгресĕн пĕлтĕрхи юпа уйăхĕнчи черетлĕ Пухăвĕнче унăн ертÿçи пулма суйларĕç.
Мăшăрĕпе, чăваш эстрада юрăçипе, ЧР культура тава тивĕçлĕ ĕçченĕпе Ирина Евсеевнапа, виçĕ ача çитĕнтерсе пурнăçăн аслă çулĕ çине кăларнă. Çичĕ мăнукпа савăнаççĕ Угасловсем.

И. Прокопьев