Танăшра çуралса ÿснĕ Чăваш халăх поэчĕ Юрий Семенович Семенов (Сементер) 70 çул тултарчĕ. Январĕн 27-мĕшĕнче ăна чысласа Чăваш Республикин наци музейĕнче литературăпа музыка каçĕ иртнĕ.
Поэта Чăваш Республикин культура, национальноçсен ĕçĕсен, информаци политикин тата архив ĕçĕн министрĕн пĕрремĕш çумĕ В.Фошин саламланă. Чăваш Республикин Президенчĕн Михаил Игнатьевăн саламне вуласа панă, унта Ю.Сементер чăваш литературине сумлă тÿпе хывнине палăртнă.
Пирĕн район администрацийĕн пуçлăхĕ Владимир Александров юбиляра культурăри пысăк çитĕнÿсемшĕн, "Трак ен" ентешлĕх ĕçне активлă хутшăннăшăн тата çуралнăранпа 70 çул тултарнă май Хисеп грамоти панă.
И. Я. Яковлев ячĕллĕ Чăваш патшалăх педагогика университечĕн преподавателĕ, филологи ăслăлăхĕсен кандидачĕ Ольга Скворцова Юрий Сементерĕн нумай енлĕ пултарулăхне уçса панă.
Юбиляр ячĕпе Тутарстан Республикин халăх поэчĕ Ренат Харис салам янă.
Ентеше чăваш халăх поэчĕсем Валерий Туркай, Порфирий Афанасьев, республикăри професси писателĕсен Союзĕн председателĕ Сергей Павлов, Николай Григорьев ăсчах, культурăпа искусство деятелĕсем, федераци почта çыхăнăвĕн Чăваш Республикинчи управленийĕн пуçлăхĕ Светлана Тимофеева, республика аслă шкулĕсен преподавателĕсемпе студенчĕсем, Виктор Овчаров поэт саламланă.
Композиторсемпе пĕрле сăвăç 400 ытла юрă çырнă. Чылайăшĕ халăх юррисем пулса тăнă. Каçра Ю. Сементер сăмахĕсемпе çырнă чылай юрă янăранă. Концерта республика артисчĕсемсĕр пуçне пирĕн районтан тухнă Владимир Леонтьев, районти халăх пултарулăхĕн çурчĕн ушкăнĕ хутшăннă.