Шупашкарта Учительсен пĕлĕвне ÿстерекен институтра наци культурин "Туслăх хĕлхемĕ" фестивалĕ иртрĕ. Унта тĕрлĕ район шайĕнче çĕнтерÿçĕ ятне çĕнсе илнĕ 6-9 классенче вĕренекенсем хутшăнчĕç. Çак фестивальте пирĕн районти шкул ачисем те хăйсен пултарулăхне кăтартрĕç. Фестиваль программипе килĕшÿллĕн вĕсем  тăватă конкурсран икĕ конкурсĕнче тупăшрĕç, малти вырăнсене тивĕç пулчĕç.

«Чăвашлăх тĕнчи: тĕпчев ĕçĕсен мультимедиллĕ презентацийĕ» конкурсра Красноармейски пĕтĕмĕшле вăтам пĕлÿ паракан иккĕмĕш шкулĕнче 9-б класра вĕренекен Алексей Михайлов «К.В.Ивановăн «Нарспи» поэминчи çут çанталăк сăнарĕ» темăпа хатĕрленĕ ĕçне хÿтĕлесе 2-мĕш вырăн йышăнма пултарчĕ. Вырăс класĕнче чăваш чĕлхипе литератури тата тăван ен культури вĕренекен шкул ачисем хушшинче ирттернĕ «Çăлтăрчăк» вăйă-конкурсра вара Трак чăваш-нимĕç гимназийĕн 9-меш класĕнче вĕренекен Иванова Наталия та 2-мĕш вырăна тивĕçнĕ. Саламлатпăр!