Çурла уйăхĕн 10-мĕшĕнче ял хуçалăх отраслĕн ĕçченĕ, 30 çул хушши "Караево" (малтан "Россия") хуçалăхĕн 1-мĕш бригада бригадирĕ, районта виçĕ хутчен бригадир-чемпион хисеплĕ ята тивĕçнĕ бригадирсенчен пĕри Малинин Валериян Михайлович çуралнăранпа 60 çул тултарчĕ.

Вăл Карай ялĕнче, хресчен çемйинче çураса ÿснĕ. Ачаранпах тăван çĕре юратнăскер, хăй пурнăçне çĕр ĕçĕпе çыхăнтарнă. Çар службине тивĕçлĕ пурнăçланă хыççăн Вăрнарти совхоз-техникумра вĕреннĕ. Унтан çамрăк специалиста Çĕрпÿ районĕнчи «Память Ульянова» совхоза ĕçлеме янă. Кунта вăл хăйĕн пулас мăшăрне-юратăвне тупнă. Пĕрлешсен Малининсен çамрăк çемйи Карая, тăван енне куçса килнĕ. Ун чухне республикипех паллă "Россия" хуçалăха ЧАССР ял хуçалăхĕн тава тивĕçлĕ ĕçченĕ, Ленин тата Октябрьти революци орденĕсен кавалерĕ Егор Лукич Лукин ертсе пынă. Вăл Валериян Михайловича уй-хир бригадин бригадирĕнче вăй хума сĕннĕ. Унччен ку бригадăна Ленин тата Ĕçлĕх Хĕрлĕ Ялав орденĕсен кавалерĕ, ЧАССР ял хуçалăхĕн тава тивĕçлĕ ĕçченĕ Павел Петрович Петров ертсе пынă. 30 çул ытла ĕнтĕ (халĕ те) бригадăна В.М.Малинин ертсе пырать. Тава тивĕçлĕ çитĕнÿсемшĕн ăна Ĕç мухтавĕн 3-мĕш степеньлĕ орденĕпе, Чăваш Республикин ял хуçалăх министерствин Хисеп Грамотипе тата ытти нумай Хисеп хучĕсемпе чысланă.

Валериян Михайлович – чаплă гармонист. Унсăр вырăнти культура çуртĕнче пĕр культура мероприятийĕ те иртмест темелле.

Эпир те Валериян Михайловича пĕтĕм чун-чĕререн юбилей ячĕпе саламлатпăр, ырлăх-сывлăх, телей тата ăнăçу сунатпăр.