Чăваш Республикинче вĕри тата типĕ çанталăк темиçе эрне хуçаланать ĕнтĕ. Çанталăкăн аномали витĕмĕ пур çĕрте те сисĕнет: обществăлла транспортра çынсем тăн çухатаççĕ, "васкавлă пулăшу" та хăй ĕçне вăйлатать, çынсем кÿлĕсемпе пĕвесенче çăлăнăç шыраççĕ. Шыва кĕмелли хĕрÿ тапхăр пырать. Асăрханулăха çухатсан ырлăхпа пĕрлех инкек те кÿме пултарать çакă. 
Çу пуçламăшĕнчен пуçласа кăçал республикăра 38 инкек пулнă. 31 çын пурнăçран уйрăлнă, вĕсенчен пиллĕкĕшĕ — ачасем. Инкек ытларах шыва кĕме юрăхсăр тата чарнă вырăнсенче пулнă. Сĕнтĕрвăрри районĕнче вырăнта пурăнакансем пиллĕкĕн, Етĕрне районĕнче тăваттăн, Шупашкар районĕнче виççĕн путса вилнĕ. Пирĕн районта та июнĕн 25-мĕшĕнче Çавалта вунă çулхи хĕр ача пурнăçран уйрăлнă. Куракансем пĕлтернĕ тăрăх хĕр ача шыва кĕме юрăхсăр, чарнă вырăнта аслисемсĕр кĕнĕ.
Шыва кĕнĕ чухне инкек ан пултăр тесен шывра хăвăра тытмалли правилăсене пĕр минутлăха та манса каяс марччĕ. Тарăн вырăнсене, уйрăмах ишме пĕлмесен, ан кĕрĕр. Тата ятарласа уйăрнă вырăнсенче кĕнинчен лайăххи нимĕн те çук . Шыва кĕни инкек патне ан илсе çитертĕр тесен йывăç-курăк ÿссе ларнă вырăнсенче асăрхануллă пулмалла, тĕрĕсрех каласан, унта шыва пачах та кĕмелле мар. Шыв хĕррине пĕчĕк ачасемпе кайсан вĕсене куçран пĕр самантлăха та ан вĕçертĕр. Ишме пĕлмесен вĕсене вĕрсе хăпартнă матрац е камера çинче пулни пур чухне те çăлса хăвараймасть.
Шыв çăмăлттайлăха, эрехпе иртĕхнине каçармасть. Çакна яланах асра тытасчĕ.