Шупашкарти Наци библиотекинче Чăваш Енти писательсен Союзĕн VII съезчĕ пулса иртнĕ. Унта 2012—2017 çулсенче правлени туса ирттернĕ ĕçсем çинчен унăн председателĕ — Чăваш халăх писателĕ Юхма Мишши каласа панă, ыйтусем çине хуравланă. Ревизи комиссийĕн актне çирĕплетнĕ хыççăн çыравçăсем хăйсене канăç паман ыйтăвĕсене, шухăшĕсене уççăн пĕлтернĕ. Çав йышра тулай чăвашĕсем те чылайăн тухса калаçнă. Творчествăра уйрăмах ăнăçлă ỹсĕмсем тунă писательсене Эмине юрăç, Алексей Талвир писатель ячĕллĕ литература премийĕсем, Хисеп хучĕсем парса чысланă. Кун йĕркипе килĕшỹллĕн, съезд 17 çынтан писательсен Союзĕн çĕнĕ правленине суйланă. Союз ертỹçи пулма çитес пилĕк çуллăха Юхма Мишшинех шаннă. Съезд хăнисене Тутарстанри Аксу районĕнчи Саврăшпуç ялĕн пултарулăх ушкăнĕ, Шупашкарти Клара Осокина йĕркеленĕ “Тарават” ансамбль чăваш юрри-ташшипе савăнтарнă, Сỹтсе явнă ыйтусем тăрăх съезд тивĕçлĕ йышăнусем тунă. Чи пархатарлă тĕллевсенчен пĕри — çывăх вăхăтра Чăваш Ен çыравçисен — Юхма Мишши пĕрлĕхĕн автобиографиллĕ, библиографиллĕ справочникне кăларасси. Ку ĕçе пуçăннă та ĕнтĕ. Съезд ĕçне çак союзра тăракан ентеш-çыравçăсем: Эдисон Патмар, Владимир Константинов-Улăхсем тата Николай Ершов-Янгер хутшăннă, сĕнỹсем панă. Н. Ершова правленин çĕнĕ йышне кĕртнĕ. Юлашкинчен пурте пĕрле чăвашсене çутта кăларнă И. Яковлев палăкĕ умĕнче сăн ỹкерттернĕ.