Республикăра чăваш гербĕсемпе ялавĕсем çинчен пуçласа кĕнеке пичетленсе тухнă. Çĕнĕ кĕнекен хăтлавĕ çу уйăхĕн 24-мĕшĕнче, 14:00 сехетра Чăваш патшалăх ӳнер музейĕнче иртĕ. Асăннă кĕнекене пухса кăлараканĕ — чăваш ялавĕсен паллă авторĕ Вадим Шипунов. Çав шутра Красноармейски район Гербĕпе Ялавĕн тата кунти ял тăрăхĕсен гербĕсемпе ялавĕсен авторĕ те шутланать вăл.
Кĕнекене геральдикăллă чăваш символĕсене халаланă. Унта пĕрремĕш хут Чăваш Енĕн паянхи куна усă куракан ялавĕсем çинчен тулли ăнлантарăвне çырса кăтартнă. 
— Кăларăм пĕтĕмпех тĕрлĕ тĕслĕ сăрлă. Кĕнеке виçĕ уйăх хушши çырăннă. Ун тиражĕ хальллĕхе нумаях пулмĕ, 1 000 экземпляр çеç. Кĕнеке вырăнти хысна укçипе пичетленсе тухнă, — пĕлтерет кĕнеке редакторĕ Римма Игнатьева.
Чăваш гербĕсемпе ялавсен ятарлă кĕнеки пичетленсе тухни чăваш культуришĕн самаях усăллă. Вăл чăваш историпе культурине вĕренме пулăшĕ, музейсенче те кăларăмпа тăтăшах усă курма пулать. Кĕнеке халăх хушшинче сарăласса, вулакансене кăсăклăнтарма пултарассине автор Вадим Шипунов шансах тăрать.

Çăлкуç: http://www.chuvash.org/cgi-bin/index.cgi?a=commed&id=12009