Красноармейски районĕн вырăсла сайчĕ пĕлтернĕ тăрăх юпа уйăхĕн 24-мĕшĕнче Упи ялĕн тĕп урамĕн лапамĕнче кунта çуралса ÿснĕ тата Раççей  I Патшалăх Думин депутачĕ пулнă Я.А.Абрамов çуралнăранпа 140 çул çитнине паллă туса тата ăна халалласа сквер уçнă.

Сквера чаплă лару-тăрура уçма Красноармейски район пуçлăхĕ Григорьев В.Н., район администрацийĕн пуçлăхĕн социаллă ыйтусемпе ĕçлекен çумĕ Молотков С.Л., ял тăрăхĕн пуçлăхĕ Степанов Ю.В., Раççей Патшалăх Думинчи "Тĕрĕслĕхлĕ Раççей" парти фракцийĕн депутачĕ Аксаков А.Г. Чăваш Республикин Патшалăх Канашĕн депутачĕсем Николаев В.И., Краснов П.С., Кушев И.А., Николаев О.А.; Чăваш Республикинчи муниципалитетсен пĕрлешĕвĕн ĕç тăвакан директорĕ Николаев С.А. килсе çитнĕ. 

Пухăннисем сквера уçнă хыççăн Я.А.Абрамовăн пулас палăкĕ вырăнне чул хурса хăварнă, тавралла йывăçсем лартса илемлетнĕ. Палăка 2014 çулта çуркунне уçма палăртнă.

Уявăн иккĕмĕш пайĕ Упи ял тăрăхĕн клубĕнче иртнĕ. Вăл савăнăçлă концертпа вĕçленнĕ.