Авăн уйăхĕн 17-мĕшĕнче Красноармейски районĕн халăх пултарулăх çурчĕнче Нестер Янкас ячĕллĕ Преми лауреачĕн, Чăваш Республикинчи композиторсен ассоциацийĕн членĕн, Чăваш Республикинчи музыка обществин тава тивĕçлĕ деятелĕн, Чăваш Республикин тава тивĕçлĕ культура ĕçченĕн Юрий Васильевич Шепиловăн асăну каçĕ-концерчĕ иртрĕ.

Пултаруллă композиторăн сумлă ĕçĕ-хĕлĕ çинчен Красноармейски ял тăрăхĕн пуçлăхĕ В.К.Шестаков, Чăваш Республикинчи композиторсен ассоциацийĕн председателĕ, Раççей Федерацийĕнчи музыка обществин тава тивĕçлĕ деятелĕ Н.А.Зимин музыковед тата композитор, педагогика наукисен кандидачĕ, И.Я.Яковлев ячĕллĕ педагогика университечĕн доценчĕ, Çеçпĕл Мишши ячĕллĕ Чăваш патшалăх премийĕн лауреачĕ, Чăваш Республикин тава тивĕçлĕ культура ĕçченĕ Ю.Кудаков композитор тухса калаçрĕç, Ю.В.Шепиловăн ырă еткерлĕхне ăшă кăмăлпа аса илчĕç. Хăнасем тухса калаçнă хыççăн пухăннисем ура çине тăрса Юра Шепиловăн ырă ятне шăплăх минучĕпе асăнчĕç.

Асăну каçĕнче Юрий Шепилов кĕвĕленĕ юрăсем янăрарĕç. Вĕсене чăвашсен паллă юрăçă артисчĕсем Иван Христофоров, Зоя Лисицина, Маргарита Туринке, Тамара Григорьева тата Красноармейски тăрăхĕнчи халăх пултарулăхĕн артисчĕсем Владимир тата Любовь Григорьевсем, Татьяня Рассказова, Зоя Смирнова, Светлана Данилова, Виктор Шумилов янăратрĕç.

Раиса Сарпи поэтесса вара Юрий Шепилова халалланă сăвва вуласа пачĕ.