СССР Патшалăх премийĕн лауреачĕн, Раççей халăх артисчĕн, Раççей Федерацийĕн, Чăваш Республикин тата Дагестан ӳнерĕн тава тивеçлĕ ĕçченĕн, Шупашкар хулин Хисеплĕ гражданинĕн, нумай орден кавалерĕн, кĕскен каласан — Трак енĕн мухтавлă ывăлĕн Филипп Миронович Лукин композиторăн сумлă ячĕпе пархатарлă ĕçĕсене яланах асра тытас, çамрăк ăрăва ентешĕн ырă тĕслĕхĕпе хавхаланса пурнăç çул-йĕрне суйласа илме пулăшас тĕллевпе Красноармейски район администрацийĕ 2013 çула Филип Лукин çулĕ тесе йышăннă.
Йĕркелӳ комитечĕ Филипп Миронович çуралнăранпа 100 çул çитнине тивĕçлипе кĕтсе илме хатĕрленсе тĕп мероприятисен планне çирĕплетнĕ. Кĕçех Ф.Лукин çуралнă ялти музее тĕпрен юсама, унăн çывăхĕнчи лаптăка тирпейлеме тытăнĕç. Аякран килекен хăнасем умĕнче намăс курас мар тесе Чатукасси ял тăрăхĕн администрацийĕ ялта пурăнакансемпе темиçе хут тĕл пулнă, хăйсен çурчĕсене, пахчисене, хуралтăсене тасатма калаçса татăлнă.
Район администрацийĕн пуçлăхĕ Андрей Шестаков та айккинче юлман, Филипп Лукинăн музейне тĕрлĕ экспонат парнеленĕ.
Сумлă юхăм малалла пырать.