Пултаруллă çамрăксене палăртас, чăваш халăхĕн ырă-йăли йĕркине упраса хăварас, çамрăксен социаллă активлăхне ÿстерес тĕллевпе Трак енре Красноармейскинчи Халăх пултарулăх çурчĕн сцени синче "Чăваш пики - 2011" конкурс иртрĕ. Чи илемлĕ те сапăр пике ятне çĕнсе илес тесе 8 хĕр упраç тупăшрĕ. 

Конкурс пилĕк енлĕ тупăшура иртрĕ. 

Пĕрремĕш тупăшу - "Паллашу" дефиле. Кунта хĕр упраçсем каçхи платье тăхăнса хăйсемпе паллаштарчĕç. Жюри членĕсем хĕр пикесем культура этикечĕпе епле усă курма пĕлнине сăнарĕç.

Иккĕмĕш тупăшу - "Интеллект конкурсĕ". Кунта хĕрсем чăваш халăх йăли-йĕркине епле тарăн пĕлнине кăтартрĕç. Жюри членĕсем ертсе пыракан панă ыйтусем çине хĕрсем тулли хурав панине шута илчĕç.

Виççĕмĕш конкурс - пултарулăх конкурсĕ. Хĕрсем кунта искусствăн тĕрлĕ енĕпе хăйсен пултарулăхне кăтартрĕç. Жюри членĕсем кашни хĕр упраçăн ăсталăх шайне тивĕçлĕ хакларĕç.

Тăваттăмĕш конкурс - чăваш апачĕн кулинари ăçталăхĕн конкурсĕ. Хĕрсем хăйсен кулинари ăсталăхне кăтартассипе тупăшрĕç. Жюри вара конкурсантсен килте хатĕрлесе килнĕ чăваш наци апат-çимĕçне тулаш енчен тата пахаăах енчен хакларĕ.

Конкурсăн пиллĕкмĕш тапхăрĕ чăваш тумне тăхăнса наци тумĕпе капăрлăхĕн илемне уçса парасси пулчĕ.
Çĕнтерÿçĕсене тĕрлĕ номинаципе палăртрĕç. Жюри чи нумай балл пухнă çак хĕрсене палăртрĕ: 
– «Хÿхĕм пике» – Ксения Григорьева (Красноармейски 2-мĕш шкулĕ);
– «Çепĕç пике» – Ирина Федорова (Трак гимназийĕ);
– «Ăслă пике» – Наталья Ильина (Пикшикри кану çурчĕ);
– «Кăмăллă пике» – Отльга Афанасьева (Именкасси тĕп шкулĕ);
– «Сăпайлă пике» – Людмила Васильева (Пикшикри кану çурчĕ);
– «Ăста пике» – Екатерина Курицина (Ман Шетмĕри кану çурчĕ). 
Чи илемлĕ те сапăр "Чăваш пики - 2011" ята Пикшикри пĕтĕмĕшле вăтам пĕлÿ паракан шкулта 10 класра вĕренекен Наталья Ершова çĕнсе илчĕ. «Вице-Чăваш пики – 2011» ята вара Карай ял тăрăхĕ тăратнă Марина Степанова çĕнсе илчĕ.
Конкурса хутшăнакансем пурте диплом тата страхлакан "Поддержка" фирмăпа "Орифлейм" компанин парнисене илме тивĕçлĕ пулчĕç.