Фоторепортаж

Красноармейски салин Тĕп библиотекăн вулав пÿлĕмĕнче Нестер Янкас ячӗллӗ культурӑпа искусство тата литература пӗрлӗхӗ Вӗрентекен ҫулталӑкне халалласа "Нестер Янкас вулавӗсем" наукӑпа таврапӗлӳ конференцийӗ иртрӗ. Вӑл кӑҫалхипе ҫиччӗмӗш хут пулчĕ. Конференцие хутшӑннисем Трак енри Раҫҫей Федерацийӗн тата Чӑваш Республикин тава тивӗҫлӗ учителӗсен тата вĕсен династийĕсен педагогикӑри сумлӑ ӗҫӗсем ҫинчен калаҫрӗҫ. Чӑннипех те мухтавлӑ та хисеплӗ ентеш-вӗрентекенсем. Сӑмах май каласан, "Раҫҫей Федерацийӗн тава тивӗҫлӗ учителӗ" ятпа тӗрлӗ вӑхӑтра пурӗ 12 ҫынна чысланӑ, "Чӑваш Республикин тава тивӗҫлӗ учителӗ" ята вара 45 вӗрентекен тивӗҫнӗ. Вӗсем - Трак енӗн кун-ҫулне пуянлатакансем, вӗсем - ҫитӗнекен ӑрӑва ӑс-хакӑл парса пурнӑҫ ҫулӗ ҫине тӑратакансем. Конференцие Нестер Янкас ячĕллĕ пĕрлĕх правленйĕн председателĕ Иван Афанасьев-Чураль тата Красноармейски муниципалитет округĕнчи Чăваш наци конгресĕн уйрăмĕн ертÿçи Зинаида Михайлова ертсе пычĕç. Пурĕ 15 доклад - тухса калаçни итлерĕç.