2011 çул Красноармейски тăрăхĕнче пурăнакансемшĕн паллă тапхăр пулчĕ. Иртсе кайнă çулталăка пирĕн сумлă ентешĕмĕре, Мăн Шетмĕре çуралса ÿснĕ пĕртен пĕр Совет Союзĕн Геройне Владимир Васильевич Васильева халалларĕç. Çак паллă датăна хисеп туса паллă журналист, Трак енри тавра пĕлÿçĕсен обществин ертÿçи, ЧР халăх академикĕ, Н. Янкас тата М. Тинехпи ячĕллĕ премисен лауреачĕ В. З. Константинов "Кладезь здоровья и патриотизма” ятлă кĕнекене вулакан патне çитерчĕ. Ку авторăн тăххăрмĕш кĕнеки пулчĕ.
Вулакана пĕлме. В. В. Васильев 1911 çулхи июлĕн 11-мĕшĕнче (çĕнĕ стильпе) Мăн Шетмĕ ялĕнче çуралнă. Владимир Васильевич хăйĕн кун-çулĕн виççĕмĕш пайне çеç пурăнса ирттернĕ. Унăн малашнехи шăпине Аслă Отечественнăй вăрçă татса панă. Тăван çĕр-шывăн ирĕклĕхĕшĕн кĕрешсе В. Васильев паттăрлăх кăтартнă. Одер юхан шывĕ хĕрринчи тытса илнĕ плацдарма хÿтĕлесе пирĕн ентеш чылай фашиста тĕп тунă. Нумай хутчен аманнă пулин те, палăртнă позицирен пĕр хутчен те чакман. Хăйĕн калама çук паттăр вилĕмĕпе вуншар салтакăн пурнăçне сыхласа хăварнă. Одер çинчи 1945 çулхи январьти паттăрлăхшăн В. В. Васильева çĕр-шывăн чи пысăк наградипе чысланă.
В. Васильев хăй çуралса ÿснĕ Мăн Шетмĕ енчен иккĕмĕш тĕнче вăрçи пуçланас умĕн Горький хулине куçса кайса тĕпленнĕ. Хăй вăл енче çуралса ÿснĕ май В. Константинов паттăр çинчен тăтăшах материалсем пухма пуçланă, ĕçе вĕçне çитернĕ темелле.
Хулăн хуплашкаллă кĕнеке 238 страницăран тăрать. Кунта автор мухтавлă ентешĕмĕр "Хăçан çуралнă -вилнĕ, Тăван çĕр-шывăн Аслă вăрçине ăçтан кайнă, ăна ăçта пытарнă?” ыйтусене тĕплĕн татса парать.
Вăл кĕнекере çирĕп шухăшлă та пысăк тавра курăмлă командир шутланнă ентеш кун-çулне тĕплĕн тишкернĕ тата çутатнă. Юлашкинчен çакна палăртмалла. Вислăпа Одер, Сандомирпа Силези тапăну операцийĕсенче корпус юланутçисем уйрăмах хăюлăхпа палăрнă. СССР Аслă Канашĕн Президиумĕн Указĕпе килĕшÿллĕн 1 гварди кавалери корпусĕнчи 18 çынна Совет Союзĕн Геройĕ ятне панă. Вĕсем хушшинче пĕрремĕш гварди юланутçи Владимир Васильев та.
Кĕнеке аван чĕлхепе вуланать.
В. Васильев пурнăçĕн чылай тапхăрне Чул хула тăрăхĕнче ирттернĕ май хăнасене парне тума кĕнекен çуррине вырăсла текстпа хатĕрленĕ. Кунта пĕлмелли, вуламалли сахал мар.
"Кладезь здоровья и патриотизма” кĕнекене Шупашкарти "Новое время” типографинче 1000 экземплярпа пичетленĕ. Унта сăн ÿкерчĕксем чылай. Ăна Красноармейскинчи "Ял пур-нăçĕ” хаçат редакцийĕнче туянма пулать.

Ю.Борисов