Пушăн 20-мĕшĕнче ЧР влаç органĕсен порталĕнче «Вырăнти хăйтытăмлăх органĕсен ĕç-хĕлне хакласси» сасăлав хута кайнă. Тепĕр кун тĕлне унта 60 ытла çын хутшăннă.

Пуш уйăхĕн 6-мĕшĕнче Михаил Игнатьев ятарлă Хушăва алă пуснă. Унпа килĕшӳллĕн кăçалтан пуçласа халăхра хăйтытăмлăх (район-хула) ертӳçисем епле ĕçленине хакламашкăн çулталăкра пĕр хут ыйтăм ирттерме тытăнĕç.

Ыйтăма влаç органĕсен порталĕнчи интерактивлă майсем пулăшнипе йĕркелĕç. Халăх хаклавне экспертсен ятарлă комиссийĕ тишкерĕ. Пĕр-пĕр тытăм ĕçĕ сасăланă халăхăн 30 процентне тивĕçтермерĕ тĕк ăна япăххисен йышне кĕртĕç.

ЧР Информаципе массăлла коммуникацисен министерстви ЧР влаç органĕсен порталĕнче тата муниципалитетсен официаллă сайчĕсенче информаципе телекоммуникаци тетелĕсемпе тата информаци технологийĕсемпе усă курса ыйтăмăн веб-хурмине шухăшласа кăларнă. Ыйтăмра арçын е хĕрарăм пулнине, ӳсĕме, вĕренĕве, социаллă вырăна палăртмалла. Сасăлавçăсене ЧР Элтеперĕн ĕçне, муниципалитетсен администрацийĕсен ертӳçисене, вырăнти депутатсен пухăвне хаклама сĕнеççĕ.