Мартăн 18-мĕшĕнче районти Халăх пултарулăх çуртĕнче Вĕрентекенсен çулталăкне, Аслă Çĕнтерÿ тунăранпа 65 çул  тата Трак ен районне туса хунăранпа 75 çул  çитнине халалласа илемлĕ вулакансен черетлĕ "Çил çунат хавхипе çунатланса" III конкурсĕ иртрĕ. Ăна  Красноармейски район администрацийĕн культура, спорт тата çамрăксен ĕçĕсен пайĕ йĕркеленĕ. Конкурса Трак чăвашла-нимĕçле гимназире тата Красноармейски иккĕмĕш шкулĕнче 2-11 классенче вĕренекенсем, ачасен районти Халăх пултарулăх çурчĕ çумĕнчи "Çунат" пултарулăх кружокĕн членĕсем (ертÿçи Н.Н.Николаева) тата районти Ачасемпе çамрăксен пултарулăх çурчĕ çумĕнчи "Кăмăл" вĕренÿ пĕрлешĕвĕн членĕсем (ертÿçи З.П.Михайлова) хастар хутшăнчĕç. Пурĕ 50 номинант тупăшрĕ, хăйсен сăмах ăсталăх пултарулăхне тĕрĕслерĕç. Жюри членĕсем Шупашкартанах пулчĕç: "Тантăш" хаçатăн пай редакторĕ Р.П.Прокопьева, Чаваш наци радиовĕн аслă редакторĕ О.И.Прокопьев. Кунсăр пуçне ачасен пултарулăхне В.С. Антонова ĕç ветеранĕпе М.П.Прохоров вăрçă ветеранĕ хакларĕç. "Илемлĕ сăмах" номинацире чи пултаруллисем çаксем тесе палăртрĕç вĕсем:  С.Иванов, К.Евгеньев, Ю.Семенова, Д.Иванова, Л.Жестянова, К.Сергеева, Д.Яковлев, В.Николаев, В.Баринова (вăтам ÿсĕм); М.Якимова, Е.Иванова, Л.Степанова, Н.Иванова (аслă ÿсĕм). "Автор сăвви" номинацире чи пултаруллисем çаксем пулчĕç: М.Данилова тата Л.Кузнецова. Çĕнтерÿçĕсемпе малти вырăна тухнисем дипломсемпе парнесене тивĕçрĕç. Саламлатпăр!