![Сăн ÿкерчĕк](http://gov.cap.ru/imggen/publ/200/160940.jpg)
А. Маркова Яманакри сĕт-çу ферминче вăй хурать. Малтанах ăна пăрусем пăхма шаннă. Унтан, хĕр-упраç хушнă ĕçре чуна парса тăрăшнине кура, ĕнесем сума куçарнă. Çапла Алиса кунти опытлă дояркăпа Валентина Егоровапа пĕрле пĕр ушкăнри ĕнесене сума пуçлать. Вăл çамрăка машинăпа ĕне сăвас ăсталăха вĕрентнĕ. А. Маркова хăй те ку ĕç вăрттăнлăхне çине тăрсах алла илме ăнтăлнă. Тăрăшни паллах харама кайман. Ĕçленĕ май опыт пуянлансах пынă. Ĕç кăтартăвĕсем те пысăкланнă. Халĕ Алиса Венедиктовна Ирина Даниловапа пĕр ушкăнри ĕнесене пăхать. Иртнĕ çул вĕсем кашни ĕнерен вăтамран 4990 килограмм сĕт суса илнĕ, коллективра мала тухнă, районта виççĕмĕш вырăн йышăннă, район администрацийĕн виççĕмĕш степеньлĕ дипломне тивĕçнĕ. — Малтанах йывăрччĕ, кайран хăнăхса çитрĕм, — тет Алиса Венедиктовна. Ĕç вырăнĕ иккĕмĕш кил пулса тăчĕ ĕнтĕ маншăн. — Ĕç условийĕсемпе, хамăр кăтартусемпе кăмăллă эпĕ. Икĕ кун ĕçлетпĕр те тепĕр кун канатпăр…
Укçине уйăхсерен парса пыраççĕ тата вăл пĕчĕк мар, май уйăхĕнче вунă пин тенкĕне ларнă терĕç...
Çак кунсенче яманаксем ĕне пуçне 17 килограмм ытла сĕт суса илеççĕ, вăл пĕрремĕш сортпа каять. Тивĕçлипе хавхалантарса пырсан ĕç вăл ăнатех. Яланах çапла пултăрччĕ.
В.Егоров ("Ял пурнăçĕ") |