Красноармейски районĕн çĕнĕ энциклопедийĕ тухнине “Ял пурнăçĕнче” вуласа пĕлсенех ăна туянма районти тĕп вулавăша çул тытрăмăр. Ăна туянса “пуян çынсен” шутне кĕтĕмĕр. Халĕ вăл хамăр килĕн залĕнче тĕп вырăн йышăнса выртать. Алла илсенех çав тери пуян та паха кĕнеке пулнине ăнлантăмăр. Энциклопедие район çыннисем тахçаннах чăтăмсăррăн кĕтнине пурте пĕлеççĕ. Вăл — кашнине кирлĕ кĕнеке. Уйрăмах ăна шкулта тăван ен культурине вĕрентекенсем кĕтрĕç, паха продукцие кĕтсе илчĕçех. Хамăр тăван район историне, паянхи пурнăçа пур енлĕ çутатни кашни вулакана савăнтарать. Трак тăрăхĕ ĕçчен, пысăк тавра курăмлă, пултаруллă çынсемпе питех те пуян. Çакна энциклопедине алла тытсан уйрăмах аван туйса илетĕн. Энциклопеди вĕçĕнче хушса панă литература тĕрлĕ енлĕхĕпе савăнтарать, унăн пĕлтерĕшне татах пуянлатать. Кунта Георги хĕресне, СССР тата Раççей Федерацийĕн орденĕсене илме тивĕç пулнисен списокĕсене вырнаçтарнă. Чечен Республикинчи тата Çурçĕр Кавказри юнлă тытăçусене хутшăнса паттăрлăх кăтартнă ентешсен списокĕсене пичетленĕ. Афганистан вăрçи те пирĕн тăрăхри çамрăксен пурнăçĕнче пысăк йĕр хăварнине пурте пĕлетпĕр. Çак туллă-сăртлă çĕршывра çапăçнă, тĕрлĕрен наградăсене тивĕçнĕ яшсен тулли списокĕпе те паллашма пултаратпăр. Вĕсем пирĕн сахал маррине пурте пĕлетпĕр. Хушса панă çак материалсем энциклопедин хакне, пĕлтерĕшне татах ỹстереççĕ. Эпир сире пурне те Красноармейски районĕн энциклопедине туянма сĕнетпĕр. Вăл кашни килтех пултăр. Çĕнĕ çул уявне килнĕ тăванăрсем те унпа паллашма пултарччăр, унта кĕнĕ ентешсемпе мухтанччăр.

Татьянăпа Михаил Викторовсем.