Гурий Егорович Дуброва (Кăмакал Курккине) районта пĕлмен çын çук пулĕ. Çитес çулхи январĕн 14-мĕшĕнче 78 çул тултарать вăл. Çулĕсене пăхмасăр лара-тăра пĕлмест хайхи. Кил хуçалăхĕнче качакасем усрать, вĕлле хурчĕ ĕрчетет.

Кам-ха вăл Гурий Дубров? Г. Дубров 1934 çулта Кăмакалта çуралнă. Ачалăхĕ унăн Кĕçĕн Шетмĕ юхан шывĕ хĕрринчи лапамра вырнаçнă пĕчĕк ялта иртнĕ. Вăл хăйĕн кун-çулĕн чылай пайне райпо тытăмĕпе çыхăнтарнă, кадрсен пайĕнче тăрăшнă. Мĕн ачаранпах юрлама, ташлама юратнă. Сасси уçă, янкăс унăн. 

Тăхăр вуннăмĕш çулсенче çанă тавăрсах литература лаççине кÿлĕнчĕ ĕçтешĕмĕр. 

— Чун юрлать, кăмăл-туйăм иксĕлми манăн, — хăйĕн шалти вĕри туйăмне уçать юрăç-сăвăç. — Сакăр вунна çитиччен сцена çинчен анас мар... 

Г. Дубровăн репертуарĕнче çĕр юрă ытла та пуль... Хăй те сăвăсем çырнипе пĕрлех юрăсем те кĕвĕлет. Ытларах Н. Никоноров, И. Прокопьев, И. Степанов, Г. Яманак, В. Рудникова композиторсемпе таччăн çыхăну тытса ĕçлет. 

Вун виçĕ кĕнеке авторĕ, М. Трубина, Н. Янкас ячĕллĕ премисен лауреачĕ вăл. Гурий Егоровича ав ĕçри хастарлăхшăн медальсемпе, "Суту-илÿ ĕç отличникĕ” паллăпа, Чăваш наци конгресĕн президиумĕн Хисеп грамотипе, тав хучĕсемпе чысланă.

Юрă-ташăпа туслă, халăха пултарулăхĕпе савăнтарать. Мĕн тивĕçлĕ канăва тухнăранпах çыравçă калемне туптать, пĕр ывăнмасăр сăвă, очерк шăрçалать. Акă çак кунсенче "Трак ен" пултарулăх ушкăнĕпе Çĕпĕр тăрăхне Тюменьти чăвашсем патне Чăваш культурин кунĕсене хутшăнмашкăн çитсе килчĕ. Унта та вăл ахаль ларман: сăвă хайланă, пултарулăхне туптанă.

Çакна палăртма кăмăллă. Гурий Егорович хăйĕн мăшăрĕпе Таисия Васильевнăпа 53 çул пĕр-пĕрне килĕштерсе, юратса та çур сăмахранах ăнланса пурăнать. Тивĕçлĕ канура пулин те, иккĕшĕ те обществăлла ĕçрен аякра тăмаççĕ.  Гурий Егоровичпа Таисия Васильевна Дубровсене Раççейĕн "Юратупа шанчăклăхшăн” медалĕпе наградăланă.