Райцентрти Ленин урамĕнчи 31-мĕш номерлĕ çуртра çу уйăхĕн пуçламăшĕнче "Катрам” ветеринари аптеки уçăлчĕ. Вăл — Л. Н. Алексеева уйрăм предпринимателĕн магазинĕ.
Çынсене май пур таран пулăшас шухăшпа çак утăм патне пырса тухнă Алексеевсем. Çакăн пек ят парасси ытахальтен пулман-мĕн.
— Ман упăшкан аслашшĕ, Тусайра пурăннă Алексей Иванович, арман тытнă, кунпа пĕрлех вăл пултаруллă алă ăсти пулнă. Ялта вĕсене Катрам таврашĕ тенĕ. Çавăнпа та ку ĕçчен йăхăн ятне упраса хăварас тесе аптекăна "Катрам” ят парас терĕмĕр. Чăвашла словарьте "Катрам” сăмах питĕ пысăк пулнине пĕлтерет тесе ăнлантарнă, — хăйсен вăрттăнлăхне уçса пачĕ Лариса Николаевна. Харпăр хăй ĕçне йĕркелесе ярас çĕрте пире районти халăха ĕçпе тивĕçтерекен центр пысăк пулăшу кÿчĕ, ку тĕлĕшпе 58800 тенкĕ укçа уйăрчĕ, ачасем те айккинче тăрса юлмарĕç, паллах. Çапла пĕчĕккĕн-пĕчĕккĕн майлашăнса кайса аптекăна ĕçлеттерме пуçларăмăр. Пирĕн патран халăх татăлмасть…
Эпĕ кунта пулнă чухне иккĕн бройлер чăх тата хур чĕпписен чирĕсемпе кĕрешмелли, вĕсене ÿсме пулăшакан препарат туянса кайрĕç. Лариса Николаевна, хăй ятарлă ветеринари пĕлĕвĕ илнĕ май, клиентсене унпа мĕнле усă курмаллине тĕплĕн ăнлантарчĕ.
— Пĕр каçхине Типçырмаран пăруланă хыççăн ĕне тăрайманни тата ăна мĕнпе пулăшмалли пирки ыйтса шăнкăравларĕç, çийĕнчен кирлĕ эмел тупса парса ятăм, — калаçăва малалла тăсрĕ Л. Алексеева.
"Катрам” аптекăра ĕне выльăхсемпе сыснасем, сурăхсем валли витаминсемпе антибиотиксем, сĕт антарма пулăшакан препаратсем, çамрăк выльăхсемпе чăх-чĕпсене ÿсме пулăшакан витаминсем, йытă-кушаксем, пулăсем, попугайсем валли апатсем тата ку чĕр чунсен аксессуарĕсем, шăшисемпе, йĕке хÿресемпе кĕрешмелли препаратсем тата ытти те пур. Лариса Николаевна каланă тăрăх, вĕсем заказпа аквариумсемпе кайăксен читлĕхĕсене илсе килсе пама пултараççĕ. "Акă, халь çеç тинĕс сысни валли клетка илсе килме заказ пачĕç”, — пĕлтерчĕ аптека хуçи. Асăннă ветеринари аптеки эрнен 1—5-мĕш кунĕсенче — 8 сехетрен пуçласа 17 сехет çурăччен, шăмат кунсенче 9-тан пуçласа 14 сехетчен ĕçлет. Вырсарни кун — канмалли кун.
— Пирĕн пата кĕрсе çÿрĕр, эпир сирĕн ыйтăвăрсене яланах тивĕçтерме хавас, — тет район çыннисене Л. Алексеева уйрăм предприниматель.

В. Егоров