Шупашкарти наци библиотекин лару залĕнче тăван тăрăхпа интересленекенсен çулталăкри пухăвĕ пулса иртрĕ. Ăна Наци библиотекин пай пуçлăхĕ Г.П. Соловьева йĕркелесе пычĕ. Пухура чи малтанах В.П. Станьял паллă доцент-ăсчаха сăмах пачĕç. Виталий Петрович Атăл тăрăхĕнчи чăвашсен краеведени юхăмне йĕркелекенĕ пулнă, республикăри таврапĕлỹçĕсен пĕрлĕхне чылай вăхăт ăнăçлă ертсе пычĕ. Вĕрентекенĕмĕр тăван тăрăха тĕпчекенсен XII съезчĕн программи мĕнле пурнăçланса пыни çинчен тата малалла мĕнле ĕçлемелли пирки тĕплĕн каласа пачĕ. Таврапĕлỹçĕсен республикăри хальхи пуçлăхĕ С.Л. Сорокин, краеведсен, Наци библиотекин специалисчĕ Р.В. Степанова районсенчи библиотекарьсен пĕлтĕрхи ĕçĕ-хĕлне тишкерчĕç. Тутарстанри таврапĕлỹçĕсен ертỹçине А.Н. Семенова, В.Н. Алмантай тата В.А. Милютин ăсчахсене авалхи йăла-йĕркепе юрă-ташăна сыхласа хăварасси, ăна паянхи пурнăçра малалла аталантарасси шухăшлаттарать. Мăн Сĕнтĕр ялĕ çывăхĕнчи этнопарк управçи В.Д. Эльмень хăйсем епле ĕçлени пирки каласа кăтартни, Н.М. Адер меценат Çĕмĕрле районĕнчи Кăмаша чĕртсе тăратас тĕллевпе ялти хастарсем мĕн-мĕн тунине ăмсанмалла ĕнентерни итлекенсене пурне те килĕшрĕ. Е.Н. Евграфова — республикăри истори архивĕн директорĕн çумĕ. Вăл архив фондне пуянлатма краеведсем те пулăшма пултарнине асăнчĕ, Уруков урамĕнчи çуртра çĕнĕ вулав пỹлĕмĕ уçăласса пĕлтерчĕ. Таврапĕлỹçĕсен республикăри пухăвĕн ĕçне Чăваш халăх ăс-хакăлпа ỹнер академийĕн президенчĕ Е.Е. Ерагин тата вице-президенчĕ Л.А. Ефимов хутшăнчĕç, Л. Ефимов профессор сăмах тухса каларĕ. Таврапĕлỹçĕсене пухура Шупашкар районĕнчи “Палан” художество пултарулăх коллективĕ хăйĕн юрри-ташшипе савăнтарчĕ. Ĕçлĕ тĕлпулăва Трак тăрăхĕнчи В.С. Серафимовпа В.З. Константинов крае-ведсем те хутшăнчĕç.

В. Константинов.