Фоторепортаж

Районти культура çуртĕнче йăлана кĕнĕ “Трак ен пики – 2019” конкурс иртнĕ. Ăна район администрацийĕн пуçлăхĕн çумĕ В.Ю. Иванов уçнă. Вăл куракансене тата конкурса хутшăнакан хĕр-упраçсене çывхарса килекен Хĕрарăмсен уявĕ ячĕпе саламланă, Çавăн пекех салам сăмахĕсене ЧНКан Красноармейски районĕнчи уйрăмĕн передседателĕ З.П. Михайлова тата Республикăри хĕрарăмсен канашĕн Красноармейски районĕнчи уйрăмĕн ертÿçи Р.А. Николаева каланă, конкурсантсене тупăшура ăнăçу суннă. Кăçалхи тупăшăва пилĕк пике хутшăннă. Тупăшăва хутшăннă пикесем малтанах хăйсемпе паллаштарчĕç, унтан вĕсен Чăваш халăх культурипе йăли-йĕркине пĕлнине кăтартма тата пултарулăх конкурсĕ витĕр тухма тивнĕ. Хĕрсем нацин пĕр-пĕр апат-çимĕçне хатĕрлесе унăн вăрттăнлăхĕсем çинчен те каласа кăтартнă. Юлашкинчен вĕсем чăваш наци тумне тăхăнса хăйсен илемлĕхĕпе тыткăнланă. Пикесен ăсталăхне тăватă çынран тăракан жюри хак панă: ЧНКан Красноармейски районĕнчи уйрăмĕн передседателĕ З.П. Михайлова (председатель), район администрацийĕн пуçлăхĕн çумĕ В.Ю. Иванов, Ача-пăча тата çамрăксен пултарулăх çурчĕн директорĕ А.П. Клементьева тата «Вице-Трак ен пики – 2016» Анна Никифорова.

Çивĕч тупăшура “Трак ен пики-2019” ята Анна Исакова (Красноармейски вăтам шкулĕ) çĕнсе илнĕ. “Вице-Трак ен пики-2019” — Влада Степанова (Трак вăтам шкулĕ). Анна Еперина “Ăста пике” (Алманч вăтам шкулĕ), Маргарита Иванова «Тарават пике» ((Трак вăтам шкулĕ)), Екатерина Петрова «Сăпайлă пике” (Чатукасси шкулĕ) номинацисенче палăрнă. «Куракансем кăмăлланă пике» ята вара Влада Степанова (Трак вăтам шкулĕ) çĕнсе илнĕ. Тăхтавсем вăхăтĕнче куракансене Сергей Петров эстрада юрăçи, Н. Никоноров, Н. Филиппова, С. Васильева, А. Алексеев, Н. Яковлев тата “Взгляд” ташă ушкăнĕ (А. Яковлева) савăнтарнă. Маттур пикесем Дипломсемпе парнесене тивĕçнĕ. Спонсор пулса Красноармейски райповĕн канашĕ (директорĕ – Р.А. Николаева) тăрăшнă.