Эпӗ 1977—1980 ҫулсенче Ҫӗрпӳ райсовет ӗҫтӑвкомӗн председателӗнче
ӗҫлерӗм. 1980 ҫулхи июль уйӑхӗнче ман пата Красноармейски райсовет ӗҫтӑвкомӗн ертӳҫи Л. К. Константинов тата унти райплан председателĕ
В. П. Павлов килчӗҫ. Сывлӑх суннӑ хыҫҫӑн вӗсем мана
тӳрех партии Красноармейски райкомӗн пӗрремӗш
секретарĕ пулма агитаци тума килнине пӗлтерчӗҫ.
Трак енрен килнӗ юлташсем ун чухнехи районти коммунистсен вожакӗн Г. П. Касихинан мораль тӗлӗшӗнчи ҫитменлӗхӗсемпе йӑнӑшӗсем ҫинчен парти обкомӗн представителӗсем
ыйтса пӗлни ҫинчен каларӗҫ.
Эпӗ вӗсене хама тата ҫемьене Ҫӗрпӳре килӗшнине, Красноармейскине каялла таврӑнма аван маррине палӑртса
хӑнасене ӑсатса ятӑм. Тепӗр темиҫе кунтан ман пата
районти "Большевикпа" "Россия" колхозсен председателӗсем Ф. С. Семеновпа Е. Л. Лукин пырса кайрӗҫ. Вӗсем те мана Красноармейскине таврӑнма питӗ ӳкӗтлерӗҫ. Кӗҫех мана партии Чӑваш обкомӗн пӗрремӗш секретарĕ И. П. Прокопьев хӑй патне чӗнсе илчӗ, манӑн кандидатурӑна партии
Красноармейски райкомӗн пӗрремӗш секретарĕ
пулма сӗнесси ҫинчен каларӗ. Эпӗ хамӑн шухӑшсене
пӗлтерсен, Илья Павлович мана Мускаври партии
аслӑ шкулӗнчен вӗрентсе кӑларни тата Трак
ен тӑрӑхӗнчи коммунистсем хӑйсен ертÿҫинче мана курни ҫинчен пӗлтерсен, килӗшрӗм. Ҫапла майпа манӑн Красноармейскине
каялла таврӑнмалла пулчӗ. Ҫакӑншӑн паян пачах та кулянмастӑп.
1980-1990 ҫулсенче районти хуҫалӑхсенче ҫӗкленӗ
фермӑсемпе мехпарксем, шкулсемпе культура ҫурчӗсем тата район центрӗнче туса лартнӑ
социаллӑ объектсем, пурӑнмалли ҫуртсем халӗ те куҫ умӗнчех. Уйсенче хӳхӗм тыр-пул ҫитӗнни, фермӑсенче картиш тулли выльӑх-чӗрлӗх пулни, строительство
ӗҫӗсем ҫултан ҫул сарӑлса пыни пурне те савӑнтарнӑ. Районти мӗн пур коллективсем ҫулленех социализмла
обязательствӑсем йышӑнса хӑйсен умӗнчи тӗллевсене палӑртнӑ. Ҫулталӑк вӗҫленсен
район ӗҫченӗсен ӑмӑртӑвӗн кӑтартӑвӗсене пӗтӗмлетнӗ, малта пыракансене професси енӗпе "Чи
лайӑххи" ятсене панӑ. Ҫак тапхӑрта парти райкомӗнче ӗҫлекенсем тӑтӑшах ӗҫ коллективӗсенче
пулнӑ, ӗҫ условийӗсемпе паллашнӑ, лайӑх ӗҫлеме чаракан чӑрмавсене тупса палӑртнӑ,
пуҫлӑхсенчен ҫирӗп ыйтнӑ, отчетсем итленӗ.
Хамӑн аса илӳсенче эпӗ вӑл ҫулсенче уй-хирте, выльӑх-чӗрлӗх фермисенче, культурӑпа вӗрентӳ тата
медицина учрежденийӗсенче, предприятисемпе организацисенче
палӑрнисен ячӗсене асӑнмарӑм. Хам ума пачах
ун пек тӗллев лартман. Район 75 ҫул тултарнӑ ҫулталӑкра "Ял пурнӑҫӗ" вӗсем пирки
тӑтӑшах ҫырчӗ, малашне те ҫырӗ, Трак
енре иртекен мероприятисенче хастарсен яч-ӗсем тӑтӑшах
янӑрӗҫ. Ҫакна шансах тӑратӑп.
Статьяра ҫакӑн
пек сӗнӳ паратӑп. Эпир ҫулленех
Чӑваш автономине туса хунӑ кун "Республика кунне" паллӑ тӑватпӑр, хальлӗхе вара "Район кунӗ" ҫук. Ҫавӑнпа та район депутачӗсен Пухӑвне январĕн 25-мӗшне "Район кунӗ" тесе йышӑну кӑларма сӗнетӗп. Вӑл кун, май шутпа, ҫулталӑк кӑтартӑвӗсене пӗтӗмлетсе ҫӗнӗ ҫул тӗллевӗсене
палӑртни питӗ меллӗ пулӗччӗ.
1982 ҫулхи февраль уйӑхӗнче Трак ене "Горькийтрансгаз" представителӗсем
килсе ҫитрӗҫ. Вӗсем "Заволжская" газ уҫлакан станцине тума пуҫлас ыйтусене сÿтсе явма килнӗ. Малтанах вӗсем мана
Анатолий Иванович Слукинпа паллаштарчӗҫ, унӑн
биографийӗ ҫинче чылайччен чарӑнса тӑчӗҫ. А
И. Слукин ку ӗҫре ҫӗнӗ ҫын мар, таҫта та пулса курнӑ, питех те пуян опыт пухнӑ. Анатолий Иванович
мана питех те кӑмӑла кайрӗ, эпӗ унӑн кандидатурине
часах ырларӑм. Делегаци ӗҫ пÿлӗмӗнчен тухнӑ
май вӑл кӑштах тытӑнса тӑчӗ, мана тав туса
тепӗр хут алӑ тытрӗ. Эпир кӗске вӑхӑтлӑха сывпуллашрӑмӑр.
Тепӗр икӗ эрнерен А. И. Слукин
ӗҫлемеллех килсе ҫитрӗ, тӳрех ман пата кӗчӗ. Асӑннӑ станцине туса пӗтернӗ ҫӗре эпир пӗр-пӗрне
питех те аван пӗлсе ҫитрӗмӗр. Анатолий
Ивановичпа килӗштерсе ӗҫлерӗмӗр, темиҫе хутчен те
Ленинградра, Мускавра тата Чул хулара пултӑмӑр. Эпӗ
ун ҫинчен "Район иккӗмӗш хут ҫурални"
статьяра тӗплӗн ҫырнӑччӗ, ҫавӑнпа та
халӗ унпа ҫыхӑннӑ пӗр икӗ саманта кӑна аса
илем.
1984 ҫулта райцентрта иккӗмӗш вӑтам шкул ҫуртне тӑвас ыйтӑва
хускатнӑччӗ. Эпир ӑна ҫӗклемешкӗн "Горькийтрансгаз" пӗрлешӳ пуҫлӑхӗсемпе
укҫа-тенкӗ уйӑрса парас ыйтусемпе калаҫса татӑлтӑмӑр. Вӑхӑчӗ пӗчӗккӗн шӑвать, анчах
шкул ҫуртне тума çавах тытӑнман-ха. Строительсем укҫа ҫукки ҫине йӑвантараҫҫӗ.
1985 ҫул вӗҫӗнче Л. К. Константиновпа А. И. Слукин Чул хулана тухса кайрӗҫ, "Горькийтрансгазӑн" финанс управленийӗн
пуҫлӑхӗпе тӗл пулчӗҫ. Эпӗ вӗсене "ҫак ыйтӑва туллин татса памасӑр каялла ан
таврӑнӑр" терӗм.
Вӗсем унта мӗнле
кайса килни ҫинчен халӗ уҫҫӑн каласа пама та юрать пулӗ. Пирӗн делегаци финанс управленийӗн пуҫлӑхӗпе чылайччен сӑмахланӑ,
ыйтӑва пире майлӑ татса пама май килнӗ. Каялла киле таврӑннӑ чухне Воротынец хули
патӗнче автоавари пулнипе машинӑсене вӑхӑтлӑха ҫӳреме
чарнӑ пулнӑ. Чылай паха вӑхӑта ҫухатаҫҫӗ вӗсем ҫул ҫинче, патшалӑхӑн автоинспекци
ҫыннисем умӗнче те пуҫ ҫапма тивет.
| 
Русская версия 
