Сăн ÿкерчĕкре эсир ял хуçалăх производствин ветеранĕсене куратăр. Вĕсем виççĕшĕ те — (сулахайран сылтăмалла) Н. М. Матвеев, А. А. Андреев тата Ю. О. Осипов — хăй вăхăтĕнче тĕрлĕ хуçалăхсене ертсе пынă.
Н. Матвеев, акă, çĕнĕ выççăлккăсем. Халĕ 78 çулта пырать. Ученăй агроном, Чăваш патшалăх ял хуçалăх институтĕнче вĕреннĕ. Тракторист, хуçалăх заведующийĕ, бригадир, агроном, "Герой” колхоз председателĕн çумĕнче, председательте чылай çул вăй хунă. Тивĕçлĕ канăва тухсан, Чатукассинчи Ф. М. Лукин музей директорĕнче тимленĕ. Ĕçри хастарлăхшăн Николай Матвеевича Ĕçлĕх Хĕрлĕ Ялав орденĕпе наградăланă, 2003 çулта "Чăваш Республикин культура тава тивĕçлĕ ĕçченĕ” хисеплĕ ят панă.
Паян та алă усса лармасть вăл. Нумаях пулмасть Н. М. Матвеева ветеран-аграрниксен районти уйрăмĕн правлени членĕ пулма суйларĕç.
А. Андреев — яманаксем. Николай Матвеевичран темиçе уйăх çеç аслăрах. Специальноçĕпе — техник-механик. 1976 çулта Çĕрпÿри ял хуçалăх техникумĕнчен вĕренсе тухнă Агафон Андреевич. Тракторист, трактор бригадин бригадирĕ пулнă. "Красное Сормово” колхозра тĕп инженерта, 1973—1997 çулсенче председательте вăй хунă. Ăна "Чăваш Республикин тава тивĕçлĕ механизаторĕ” хисеплĕ ят панă.
Ю. Осипов — красноармейскисем, 1937 çулхи майăн 16-мĕшĕнче çуралнă. Шкул хыççăн Чăваш патшалăх ял хуçалăх институтĕнчен (1960 çулта) вĕренсе тухнă. Направленипе 5 çул Мордва Республикинче ĕçленĕ. Унтан Елчĕк районĕнчи ял хуçалăх управленийĕнче аслă агрономра, тĕп агрономра, "Сельхозхими” пĕрлешÿ председателĕнче тимленĕ, пĕр вăхăт парти райкомĕн ял хуçалăх пайĕн заведующийĕ пулнă. 1984 çултан пурнăçне хамăр районпа çыхăнтарнă: 10 çул "Красноармейский” совхоз директорĕнче вăй хунă. Тивĕçлĕ канăва Юрий Осипович район администрацийĕн экономика пайĕнче ĕçлесе тухнă. Тăрăшулăхшăн Ю. О. Осипова "Хисеп палли” орденпа, "Ĕçри хастарлăхшăн. В. И. Ленин çуралнăранпа 100 çул çитнĕ май”, "Ĕç ветеранĕ”, çĕр-шывăн Халăх Хуçалăх Çитĕнĕвĕсен Куравĕн ылтăн тата кĕмĕл медалĕсемпе чысланă.
Çирĕм-çирĕм пилĕк çул каялла тунă сăн ÿкерчĕке алла татах илетĕп. Унтан ăшă кăмăллă çынсем тинкереççĕ. Виççĕшĕ те пурнăçне ял хуçалăхĕпе çыхăнтарнă, ертÿçĕре те тар тăкнă. Унтанпа шыв-шур нумай юхрĕ. Вĕсем халĕ — тивĕçлĕ канура. Апла пулин те чун-чĕри вĕри-ха вĕсен: халăх хушшинче ытларах пулма тăрăшаççĕ, тĕрлĕ хутшăнусенче тата район хаçачĕ урлă та тăван Трак ен пурнăçĕпе интересленме, кирлĕ пулсан, сĕнÿ-канаш пама вăхăт тупаççĕ. Ялан çапла пултăр!
Русская версия 
