Республикăри районсем хушшинчи "Çамрăк ăсчах - 2011" вăйă конкурсăн пĕрремĕш куçăмсăр турĕ вĕçленчĕ. Ăна Красноармейски районĕнчи вĕрентÿ пайĕн информаципе методика центрĕ çумĕнчи чăваш чĕлхипе литератури вĕрентекенсен меслетлĕх ушкăнĕ йышăннипе ирттернĕ. Ушкăн ертÿçи - З.П.Михайлова. Вăйă конкурс авторĕ тата ăна пуçарса йĕркелесе пыраканĕ - В.М. Михайлов. Конкурс ака уйăхĕн 1-мĕшĕнчен пуçласа ака уйăхĕн 14-мĕшĕччен пычĕ. Унта хутшăнакансен "Çамрăк ăсчах" вăйă конкурс сайтĕнче 35 ыйтуран тăракан тест ыйтăвĕсем çине онлайн (тÿрĕ çыхăнура) хуравламаллаччĕ. Сайта пурĕ 382 ача кĕрсе ĕçе пурнăçлама çырăннă. Вĕсенчен 262-шĕ тест ыйтăвĕсене хуравланă. Тулли хурав памашкăн 230 ача çеç пултарнă. Вĕсенчен вăйă конкурсăн куçăм (иккĕмĕш) турне хутшăнма 68 ача ирĕк çĕнсе илнĕ. Вĕсен ятлăхне http://chuvsite.ucoz.ru/ сайтран уçласа илме пулать.

Районсем тăрăх кам мĕнле хутшăннине шута илес пулсан, вĕрентекенсемпе ачасен хастарлăхĕ çапларах курăнать: Вăрмар районĕ - 62 Сĕнтĕрвăрри районĕ - 62 Элĕк районĕ - 54 Красноармейски районĕ - 49 Канаш районĕ - 42 Шупашкар хули - 26 Тутар Республики - 19 Шупашкар районĕ - 9 Куславкка районĕ - 9 Хĕрлĕ Чутай районĕ - 9 Елчĕк районĕ - 9 Етĕрне районĕ - 8 Çĕрпÿ районĕ - 8 Муркаш районĕ - 6 Комсомольски районĕ - 5 Патăрьел районĕ - 2 Йĕпреç районĕ - 1 Вăрнар районĕ - 1 Çĕнĕ Шупашкар хули - 1 Мускав хули - 1  

Конкурсăн куçăм турĕ Красноармейски иккĕмĕш шкулĕнче ака уйăхĕн 21-мĕшĕнче пулать. Вăл 11 сехетре пуçланать. Унта пыма кăмăл тăвакансен mixaj_58@mail.ru электрон почтипе çыру-хыпар ямалла. Унăн хапине (формине) http://chuvsite.ucoz.ru/ сайта вырнаçтарнă.