Конкурс пĕтĕмлетĕвĕ 

Халăх пултарулăхĕн районти çуртĕнче "Çил çунат çуначĕ айĕнче” ятпа сăвă вулакансен районти IV конкурсĕ иртнĕ. Республикăри тупăшăва каймашкăн суйласа илмелли тура Трак енри шкулсенче вĕренекенсем хутшăннă. 
Конкурс виçĕ номинаципе иртнĕ: "Илемлĕ литература произведенийĕнчи хайлава вуласси”, "Авторăн хăй çырнă сăввине илемлĕ вуласси”, "Литературăпа музыка композицийĕ”. Тупăшăва хутшăнакан ачасене виçĕ ушкăна — кĕçĕн, вăтам тата аслă— уйăрнă. 
Зал илемлĕ тум тăхăннă ачасемпе тулнă. Кунтах вĕсене тупăшăва хатĕрленĕ шкулсенчи чăваш тата вырăс чĕлхисен учителĕсем. Тăватă сехете яхăн пынă конкурс пурин кăмăлне те кайрĕ. Унта пынисем пирĕн ачасем сăвă вулама, хăйсем те сăвă шăрçалама пултарнине курса тата итлесе тĕлĕнчĕç. 
Конкурса 80 ача хутшăнчĕ. Жюри (унта республикăри Çамрăксен театрĕн артисчĕ В. Григорьев кĕчĕ) республикăри тупăшăва кайма чи тивĕçлисене палăртрĕ. 
Кĕçех вĕсем район чысне республика шайĕнчи тупăшура хÿтĕлĕç.

Ю.Борисов