Фоторепортаж
Красноармейскинчи Халăх пултарулăх çурчĕ çумĕнчи "Юхăм" драма коллективĕ куракансем умне çĕнĕ премьерăпа тухрĕ. Артистсем Анатолий Чебанов çырнă икĕ пайлă "Тарçă" камите лартса пачĕç.
Камит сюжечĕ паянхи пурнăçпа тачă çыхăннă. Ĕçсĕр тăрса юлнă арçыннăн арăмĕ чикансемпе явăçса килтен тухса каять. Унăн ирĕксĕрех ĕç шырама тивет. Пĕр пуян çемьене тарçă кирлĕ иккен. Анчах та хĕрарăм-тарçă кирлĕрех иккен вĕсене. Çавăнта вырнаçать те арçын ĕçлеме. Хĕрарăм тумне тăхăнса ĕçлет вăл унта. Тем тĕрлĕ мыскара курса пĕтет вара.
Кулăшла самантсем чылай камитре. Юрă-кĕвĕ те сахал мар. Курма-пăхма  аван.
Кун пек япала çитменлĕхсĕр пулмасть ĕнтĕ. Артистсем хăйсен сăмахĕсене манса кайни, кирлĕ мар çĕрте ытлашши пауза туни, музыка ăнăçлах марри - камит хаклавне кăшт ÿкерет. Çапах та, пĕтĕмĕшле илсен, премьера ăнăçлă пулса тухнă.
К.И.Васильева режиссер-постановщик лартнă ку пьесăна. Рольсенче Красноармейски ял тăрăхĕн тĕрлĕ предприятийĕсемпе учрежденийĕсенче вăй хуракан Юрий Филиппов, Лидия Степанова, Галина Михайлова, Раиса Степанова, Геннадий Сергеев, Алина Григорьева тата Геннадий Яковлев вылярĕç. Массăллă сценăсенче Красноармейски салинчи шкулсенче вĕренекен Анастасия Жидова, Эрпинес Степанова тата Анюта Маркова хăйсен пултарулăхне кăтартрĕç. Куракансем пултаруллă режиссера тата халăхран тухнă Трак ен артисчĕсене ăшшăн алă çупса саламларĕç.