Çавна май районти Культура çуртĕнче халăх фольклор ку ансаблĕн пултарулăх каçĕ пулчĕ. ИСТОРИРЕН. Районти Н. Янкас ячĕллĕ культурăпа искусство тата литература пĕрлĕхĕн ертỹçи И. Прокопьев аса илнĕ тăрăх, “Трак ен” ансамбль 1992 çулхи раштав уйăхĕнче йĕркеленнĕ. Пуçаруçăсем райпо канашĕн председателĕ А. Дмитриева, чăваш чĕлхи учителĕсем Зинаидăпа Виталий Михайловсем, Ю. Миронов аккомпаниатор пулнă. Пĕрремĕш репетицине 20-е яхăн çын пуçтарăннă. Халĕ ку халăх фольклор ансамблĕн концерт программин репертуарĕнче хăна, туй, салтак, ларма юррисем тата ыттисем. 1999 çулта вăл районти Н. Янкас ячĕллĕ преми лауреачĕ пулса тăнă, 2001 çулта “халăх” ятне çĕнсе илнĕ, ЧР Патшалăх Канашĕн, культура, национальноçсен ĕçĕсен, информаци политикипе архив ĕçĕн, ЧНК-н тата ыттисен Хисеп грамотисемпе Тав çырăвĕсене тивĕçнĕ. Халĕ ансамбле А. Никонорова ертсе пырать. Концертсене ку ушкăн тăтăшах хутшăнать, вăл çитмен ял районта юлман та пуль! “Трак ен” хăйĕн пултарулăхне Мари Эл Республикинчи Морки районĕнче, Тутарстанра, Тюменьпе Чулхула облаçĕсенче кăтартнă, тĕрлĕ фестиваль-конкурссене хутшăнса палăрнă. Хăйĕн кĕмĕл юбилейне хальхинче те ансамбль сцена çинче “Улахра”, “Тăла тỹни” йăла-йĕркесене кăтартнипе пуçларĕ. Унтан ăна Вăрнар районĕнчи “Санар” фольклор ушкăнĕ саламларĕ. Ятарлă сценарипе Чатукассисем, Алманчсем, Уписем, Еншик Чуллăсем, Мăн Шетмĕсем тата Кĕçĕн Шетмĕсем юрă-ташăри пултарулăхĕпе савăнтарчĕç. “Трак ене” малалла район администрацийĕн пуçлăхĕн тивĕçĕсене вăхăтлăх пурнăçласа пыракан Я. Григорьев, социаллă аталану тата архив ĕçĕн пайĕн начальникĕ Р. Осипова, ЧНК-н районти уйрăмĕн ертỹçи З. Михайлова, Н. Янкас ячĕллĕ культурăпа искусство тата литература пĕрлĕхĕн председателĕ И. Прокопьев, Янкас ялĕнчи Н. Ершов сăвăç-çыравçă ыр сунчĕç, Тав хучĕсемпе парнесем пачĕç. Куракансем çỹлерех асăннă ушкăнсемсĕр пуçне Михаил Луков хут купăсçăн, Вăрнарсен пултарулăхне тăвăллăн алă çупса йышăнчĕç. Икĕ сехете яхăн пынă программăна (ăна Н. Филиппова йĕркелесе пычĕ) “Трак ен” халăх фольклор ушкăнĕ вĕçлерĕ. Пĕр сăмахпа, тав тата мухтав унти юрăçсене! Юбилейĕсем татах та татах килччĕр!

В. Данилов.