Фоторепортаж

Районти культура çуртĕнче, Ашшĕпе амăшĕн çулталăкне халалласа, йăлана кĕнĕ “Трак ен пики” конкурс иртнĕ. Кăçалхи тупăшăва сакăр пике хутшăннă. Вĕсене малтанах район администрацийĕн пуçлăхĕ С. Молотков, “Ял çамрăкĕсен Раççейри союзĕн” Пĕтĕм Раççейри обществăлла организацин вырăнти уйрăмĕн председателĕ Д. Посадский, районти Хĕрарăмсен канашĕн председателĕ Р.Николаева саламланă. Тупăшăва хутшăннă пикесем малтанах хăйсемпе паллаштарчĕç, унтан вĕсен Чăваш ен историне, культурине, йăли-йĕркине пĕлнине кăтартма тата пултарулăх конкурсĕ витĕр тухма тивнĕ. Хĕрсем нацин пĕр-пĕр апат-çимĕçне хатĕрлесе унăн вăрттăнлăхĕсем çинчен те каласа кăтартнă. Юлашкинчен вĕсем чăваш наци тумне тăхăнса хăйсен илемлĕхĕпе тыткăнланă. Пикесен ăсталăхне пилĕк çынран тăракан жюри хак панă. Çивĕч тупăшура “Трак ен пики-2017” ята Анастасия Козлова (Трак вăтам шкулĕ, 9 класс) çĕнсе илнĕ. “Вице-Трак ен пики-2017” — Анна Кузьмина (Карай ял тăрăхĕ). Анна Еперина “Ăс пике” (Алманч вăтам шкулĕ), Анита Алемесова “Çепĕç пике” (Пикшик вăтам шкулĕ), Надежда Петрова «Хÿхĕм пике» (Кĕçĕн Шетмĕ ял тăрăхĕ), Диана Данилова “Кăмăллă пике” (Красноармейски вăтам шкулĕ), Карина Антонова «Тарават пике» (Упи ял тăрăхĕ), Ольга Илларионова “Сăпайлă пике” (Красноармейски вăтам шкулĕ) номинацисенче палăрнă. «Куракансем кăмăлланă пике» ята вара Анастасия Козлова («Трак ен пики-2017») çĕнсе илнĕ. Тăхтавсем вăхăтĕнче куракансене А. Алексеев, Н. Яковлев, тата “Взгляд” ташă ушкăнĕ (А. Яковлева) савăнтарнă. Маттур пикесем Дипломсемпе парнесене тивĕçнĕ.