Раштав уйăхĕн 23-мĕшĕнче район администрацийĕн ларусен залĕнче районти обществăлла пуçарулăх ушкăнĕн йĕркелÿ пухăвĕ  иртрĕ. Ăна регионсемпе нацисем хушшинчи туслăхпа этноçыхăнăва вăйлатас, чăваш нацин ăс-хакăлпа пурлăх культурине аталантарас тĕллевпе пуçарнă. Пухăва Красноармейски район администрацийĕн пуçлăхĕ Шестаков А.В., ял тăрăхĕсен пуçлăхĕсем, муниципалитетăн бюджетлă учрежденийĕсен пуçлăхĕсем, культура тата вулавăшпа музейсен ĕçченĕсем, шкулсенче чăваш чĕлхипе литератури вĕрентекенсем, таврапĕлÿçĕсем, çыравçăсемпе журналистсем хутшăнчĕç.

Пухăва Чăваш Республикин муниципаллă органсен Совечĕн ĕç тăвакан директорĕ, Чăваш наци конгресĕн  Президиум членĕ Николаев С.А. ертсе пычĕ. Вăл Чăваш наци конгресĕн юлашки съезчĕ йышăннă резолюцисемпе паллаштарчĕ, тăван халăхăн ырă йăли-йĕркине упрамалли тата ăна малалла аталантармалли çинчен сăмах пуçарчĕ. Чăваш наци конгресĕ районсемпе хуласенче хăйĕн уйрăмĕсене уçма палăртнине пĕлтерчĕ, çавна май ăна Трак енре те уçма сĕнчĕ.

Пуху пĕр саслă пулса Чăваш наци конгресĕн Красноармейски районĕнчи уйрăмне уçма йышăнчĕ.

Тÿрĕ сасăлавпа  пуху Чăваш наци конгресĕн Красноармейски районĕнчи уйрăмĕн правлени йышне çак çынсене кĕртме йышăнчĕ:  район администрацийĕн социаллă аталанупа архив ĕçĕн пай пуçлăхне Осипова Рена Михайловнăна, ял тăрăхĕсен информаципе культура центрĕнчи вулавăшăн тĕп библиотекарьне Гурьева Светлана Аверкиевнăна, Мăн Шетмĕ ял тăрăхĕн культура аталанăвĕпе вулавăш центрĕн тĕп библиотекарьне  Герасимова Раиса Гурьевнăна, Красноармейски пĕтĕмĕшле вăтам пĕлÿ паракан шкулĕнче чăваш чĕлхипе литератури вĕрентекен Михайлова Зинаида Петровнăна, район хаçачĕн пай редакторне Борисов Юрий Зиновьевича, районти Нестер Янкас ячĕллĕ пĕрлĕхĕн хисеплĕ ертÿçине, таврапĕлÿçĕне тата çыравçăна Ершов Николай Гавриловича тата районти историпе тăван тавралăх музейĕн ĕçченне Тихонова Валентина Аркадьевнăна кĕртрĕç.

Уйрăмăн правлени ертÿçи (председателĕ) пулма  тÿррĕн сасăласа Красноармейски пĕтĕмĕшле вăтам пĕлÿ паракан шкулĕнче чăваш чĕлхипе литератури вĕрентекен Михайлова Зинаида Петровнăна суйласа лартрĕç.