Ĕнер, раштавăн 13-мĕшĕнче, Красноармейскинче вырнаçнă тăрăхсен пĕрлехи информаципе культура центрĕнче ХТК ушкăнĕсен пĕтĕмлетӳллĕ вăййи иртрĕ. ХТК тени ĕнтĕ вăл хаваслипе тавçăруллисен клубĕ тени пулать, е вырăсла — КВН. Ку вăййа та районтисем çамрăксен пултарулăхне ӳстерес тĕлĕшпе ирттерчĕç. 
Пурĕ 3 ушкăн хутшăнмалла пулнă та иккĕшĕ çеç çитме пултарнă. Пĕрисем — Трак шкулĕнчи «Острые перцы» (чăв. Хаяр пăрăç) пулчĕç, теприсем — Красноармейски шкулĕнчи «Дети Газпрома» (чăв. Газпром ачисем). Унччен вĕсен суйлав вăййисем витĕр тухма тивнĕ. 
Пурĕ вăйăра 3 пай пулчĕ: хаваслипе тавçăруллисем хăйсемпе паллаштарасси, 25-мĕш кадр тата юрă-кĕвĕллĕ килти ĕç. Хаклавçăсен йышĕнче район администрацийĕнче вăй хуракан Карпова А.Г, ял хуçалăхĕпе экологи пайĕн тĕп специалисчĕ Васильев В.В. тата ыттисем пулчĕç — пурĕ 5 çын. Председатель вырăнĕнче районăн вĕренӳ пайĕн пуçлăхĕ Голубев М.Д. пулчĕ. 
Икĕ ушкăн та вăййа тĕплĕх хатĕрленни курăннă — çавăнпа та икĕ ушкăна та 1-мĕш вырăн панă, иккĕмĕш е виççĕмĕш вырăна никам та лекмен. 
Каласа хăварас пулать, ХТК вăййисем районта пĕрремĕш хут кăна иртмеççĕ, çултан çул вĕсем лайăхланса пыраççĕ.