Ял тăрăхĕсем хушшинчи информаципе культура центрĕнче «Чăваш пики – 2012» конкурс иртрĕ. Ăмăртăва пĕтĕмпе 16-25 çулхи 11 хĕр упраç хутшăнчĕ. 
Конкурсантсем хăйсен  творчествăлла пултарулăхне, кулинари ăсталăхне, ăс-хакăл шайне, сцена çинче тытма пултарнине тата уйрăмах тăван чăваш чĕлхипе калаçма мехел çитернине туллин кăтартса пачĕç. Жюри членĕсен шучĕпе вĕсем пурте çĕнтерÿçĕ ятне тивĕç, мĕншĕн тесен хĕр упраçсем тăван халăх йăли-йĕркине, ку чухнехи культурине аван пĕлнине кăтартса пачĕç.

Чи илемлĕ те пултаруллă пикене суйласа илме вара пултарулăх конкурсĕ пулăшрĕ. Конкурсантçăсем юрă та юрларĕç, сăвă та вуларĕç, ташларĕç те, музыка инструменчĕсемпе те вылярĕç.
Конкурссем витĕр ăнăçлă тухса «Чăваш пики – 2012» ята Еншик Чуллă ял тăрăхĕнче çуралса ÿснĕ, халĕ И.Н.Ульянов ячĕллĕ Чăваш патшалăх университетĕнчи искусство тата культурологи факультечĕн 2-мĕш курс студентки Елена Николаева çĕнсе илчĕ.
«Вице Чăваш пики – 2012» ята вара унран çамрăкрах пике - Красноармейски шкулĕн 10-мĕш класĕнче вĕренекен Анастасия Никифорова тивĕçрĕ. 

Ытти конкурсантсем те тĕрлĕ номинацисенче çĕнтерÿçĕ пулса тăчĕç, вĕсене те дипломсемпе тата парнесемпе чысласа хавхалантарчĕç.