Ĕнер, утăн 26-мĕшĕнче, Чăваш Республикин влаç органĕсен Порталĕнче çĕнĕ сайт уçăлчĕ — унăн чăвашла варианчĕ. Тинех халăх кĕтни, чăвашсем ыйтни пурнăçланчĕ теме пулать!
Чăвашла пай хальхи вăхăтра Чăваш Республикин социаллă-экономикин аталанăвĕн çул-йĕрĕпе, Чăваш Ен Президенчĕн, Правительствăн ĕçĕ-хĕлĕпе паллаштарать. Кунта чăваш халăхĕн историйĕ, культури, йăли-йĕрки пирки пĕлме пулать. Ытти йышши пайсе те пур, пĕринче, тĕслĕхрен, республикăра тухакан хаçатсенче пичетленнĕ материалсене вырнаçтарнă. Эпир хатĕрленĕ электронлă сăмахсарсене (каçă) те унта тупма май пур.
Тĕпрен илсен сайт хитре те меллĕ пулса тухнă. Хыпарсем те унта çĕнелсех тăраççĕ. Хатĕрлекенсем шантарнă тăрăх вăл малалла та пуянланса, лайăхланса пырĕ. Сирĕн шухăшăр-сĕнĕвĕрсем пур пулсан, вĕсене хаваспах йышăнĕç.