Çу уйăхĕн 20-мĕшĕнче, эрне кун, халăх пултарулăхĕн районти çуртĕнче, Пĕтĕм тĕнчери çемье кунне халалласа, "Çулталăкри çемье-2011” районти конкурс пулчĕ. Унта пĕтĕмпе 7 çемье хутшăнчĕ. Вĕсене район администрацийĕн пуçлăхĕ В. В. Александров пур кăмăлтан саламларĕ, чĕрĕ чечексем парнелерĕ.

Çĕнтерÿçĕне палăртма жюри членĕсене (çак йыша районти социаллă хÿтлĕх пайĕн начальникĕ Л. А. Киселев, хĕрарăмсен районти канашĕн председателĕ З. Г. Петрова, РФ Пенси фончĕн районти управленийĕн ертÿçи А. В. Петрова, ЗАГС пайĕн заведующийĕ Е. Л. Павлова тата культура пайĕн 3 представителĕ кĕчĕç) çăмăл тивмерĕ.

Виçĕ сехете яхăн пынă конкурсра  Красноармейскинчи Ананьевсем "Çулталăкри çемье-2011” пулса тăчĕç. Александр Владимировичпа (вăл Яманак ялĕнче çуралнă) Ирина Валерьевна (Çĕнĕ Шупашкар) 14 çул пĕрле шăкăл-шăкăл калаçса пурăнаççĕ. Кил хуçи 10 çул ытла ĕнтĕ РФ Пенси фончĕн районти управленийĕнче вăй хурать, волейболла выляма, пулла çÿреме юратать. Мăшăрĕ те кунтах ĕçлет, апат-çимĕç хатĕрлеме, çыхма, тĕрлĕ çырла ÿстерме кăмăллать. Вĕсен — икĕ ача. Димăпа Лена Трак гимназийĕнче вĕренеççĕ: пĕри — 7, тепри 3 классенче, тĕрлĕ конкурссене тăтăшах хутшăнаççĕ. Ананьевсем — спорт çемйи те. "Ял пурнăçĕ” хаçат ирттерекен ăмăртусене вĕсем çулленех хутшăнаççĕ. Кăçал ав çемьесен тупăшăвĕнче çĕнтерÿçĕсем пулса тăчĕç.