Районта иртнĕ çул инфекциллĕ тата паразитла чир-чĕр хуçаланнă 1815 тĕслĕхе регистрациленĕ. Е ку кăтарту 100 пин çын пуçне 11068, 4 пулнипе танлашать. Вăл 2008 çулхинчен 1, 8 процент чухлĕ чакнă.

Пĕлтĕр сывлăшран ерекен шатра чир-чĕрĕ ересси, 2008 çулхипе танлаштарсан, 2, 3 хутчен сахалланнă. Тата скарлатинăпа (сикекен йывăр чир) аптранă — 10, менингитпа чирленĕ 1 тĕслĕхе шута илнĕ. 2008 çулта çÿлерех асăннă чирсем хуçаланнине тупса палăртман пулсан, коклюш (хаяр ÿслĕк чирĕ) сарăлнă икĕ тĕслĕхе регистрациленĕ. 2009 çулта сывлăшран ерекен инфекциллĕ чирсене: дифтери, корь (хĕрлĕхен), краснуха (хĕрлĕ шатра), сарăлакан паротит ернĕ тĕслĕхсем пулман.

Пĕлтĕр грипп чирĕпе аптракансен шучĕ, малтанхи çулхипе танлаштарсан, 1, 89 хут чакнă. Пыршă, дизентери, "А” вирус гепатичĕн чирĕсем хуçаланнă тĕслĕхсем вырăн тупман. Пыршăлăх чир-чĕрĕсемпе чирлекенсем иртнĕ çул, 2008 çулхипе танлаштарсан, 1, 59 хутчен сахалланнине палăртнă.

Иртнĕ çул социаллă сăлтавсене пула сарăлакан чир-чĕрсен шучĕ чакнă. Акă, 2009 çулта гонорея (ясар чирĕ) — 1, кĕçĕ — 6 (çав шутра пĕр кил-çуртра — 4 тĕслĕх), сифилис тата микроспори чирĕ сарăлнă 2 тĕслĕхе регистрациленĕ. Пĕтĕмĕшле илсен, иртнĕ çул социаллă сăлтавсене пула хуçаланакан чир-чĕрсен хисепĕ, 2008 çулхинчен 17, 75 процент чухлĕ пĕчĕкленнĕ.

2009 çулта районта туберкулезпа тата сывламалли органсемпе чирлекенсен шучĕ, 2008 çулхипе танлаштарсан, 2, 6 процент чакнă. Бацилла (бактери) формăллă туберкулезпа чирленĕ пĕр тĕслĕх (10, 1 процент) ытларах пулнă.

Пĕлтĕр йытăсем çыртса суранлатнă 67 тĕслĕх вырăн тупнă, 2008 çулта — 25 тĕслĕх. Ку кăтарту 2, 76 хут нумайланнине çирĕплетет.

Паразитла чир-чĕр сарăласси иртнĕ çул районта, 2008 çулхипе илсен, 6, 88 процент чухлĕ сахалланнă. Энтеробиозпа аптракансен хисепĕ 13, 7 процент чухлĕ пĕчĕкленнĕ. Лямблиозпа (лĕпĕ) чирленĕ 3 тĕслĕх (1, 8 хут) ытларах регистрациленĕ.

А. Степанова