Чăваш Республикин Вĕрентÿ министерствин шкул тулашĕнчи ĕçсен центрĕн "Эткер" автономиллĕ учрежденийĕнче "Симĕс планета" экологипе туризм форумĕн шкул ачисен конкурсĕ иртнĕ. Унта республикăри 17 районтан 685 ĕç тăратнă. Форум конкурсĕ 12 номинаципе иртнĕ. Çĕнтерÿçĕсемпе призерсем хушшинче пирĕн район ачисем те пур.

Вĕсенчен пĕри - Красноармейски пĕтĕмĕшле вăтам пĕлÿ паракан иккĕмĕш шкулĕнче 9-б класра вĕренекен Алексей Михайлов. Вăл иккĕмĕш çул ĕнтĕ «Современные технологии на службе природы» номинацире экологи тата çут çанталăка упрас темăпа хатĕрленĕ сайтсен тата веб-страницăсен конкурсĕнче  çĕнтерме пултарчĕ. Пĕлтĕр "Вăрмана упрар" темăпа сайт хатĕрлесе Пĕтĕм тĕнчери "Симĕс планета - 2009" форум конкурсĕнче лауреат пулса тăчĕ, Мускава çак форумăн ларăвне кайса килчĕ. Кăçал вара "Çĕре упрар" темăпа сайт хатĕрлерĕ, республикăри "Симĕс планета - 2010" форумра пĕрремĕш вырăн йышăнма пултарчĕ. Алеша районти обществăлла ĕçе те хастар хутшăнать. Вăл - чăвашла хатĕрленĕ "Трак ен" сайт авторĕ тата модераторĕ.

«Эко - объектив» номинацири сăн ÿкерчĕксен конкурсĕнче  вара Упи пĕтĕмĕшле вăтам пĕлÿ паракан шкулĕнче вĕренекен Петров Алексей 2 вырăн йышăнма пултарнă. «Жизнь леса и судьбы людей» номинацири литература конкурсĕнче çак шкултах вĕренекен Васильева Екатеринăпа Яковлева Екатерина 3-мĕш вырăн йышăннă. Саламлатпăр!