Район пуçлăхĕ С.А. Николаев районта "Ĕççи - 2009" епле пынипе уй-хире тухса паллашрĕ. Вăл  «Караево» ЯХПĕнче, «Шатьма», «Волит» и «Красное Сормово» ОООсенче,  Шумилов, Васильева, Николаев ХФХĕсенче пулчĕ. Пĕтĕмĕшле илсен, районта ĕççи епле пынипе тата ăна йĕркеленипе кăмăллă юлчĕ вăл. Ял хуçалăх предприятийĕсен ертÿçисем сиксе тухакан ыйтусене вăхăтра татса пама тăрăшаççĕ. «Караево» ялхуçалăх предприятийĕнче район пуçлăхĕ Виталий Платонов председательпе курнăçса канашларĕ, Карай ял тăрăхĕн пуçлăхĕпе Владислав Семеновпа тĕл пулчĕ. Кунсăр пуçне ĕççинче малта пыракан комбайнерпа  Михаил Петровпа калаçрĕ. Михаил Петрович 18-мĕш ĕççине хутшăнать, кунччен 30 çул хушши водительте тăрăшнă. Кăçал унпа пĕрле Сергей ывăлĕ те ĕçлет. Комбайнер каланă тăрăх, кăçал тухăç пĕлтĕрхинчен лайăхрах. Унпа хуçалăх ертÿçи те килĕшрĕ. Йĕтем çинче икĕ сменăпа ĕçлеççĕ.

Ĕççи «экваторне» çитнĕ те ĕнтĕ  «Шатьма» тата «Волит» ОООсенче. Шумилов ХФХĕнче вырма юлашки гектарсем çинче пырать. «Красное Сормово» ОООра(ертÿçи Святослав Иванов) 3 комбайн ĕçлет, Вĕсенчен иккĕшĕ 7 кунхи пĕтĕмлетÿ тăрăх район ăмăртăвĕнче 2-мĕш тата 3-мĕш вырăна тухнă. Станисла Андреевич Валерий Кузьмин тата Владислав Филиппов комбайнерсене куçса çÿрекен вымпелсем панă, çĕнĕ çитĕнÿсем тума ырлăх-сывлăх суннă.