Халӑх пултарулӑхӗн районти ҫуртне уяв сӑнӗ ҫапнӑ: юрӑ-кӗвӗ янӑрать, сценӑна илемлетнӗ, аякранах "Аслӑ Ҫӗнтерӗве—65", "Красноармейски районне — 75" тесе ҫырнисем курӑнаҫҫӗ. Унтах пирӗн ҫарсем туллӑ-сӑртлӑ ҫёр-шывра пулнине аса илтерекен пысӑк ӳкерчёк: хӗрлӗ ҫӑлтӑр, ун ҫумӗнче гвоздика чечексем, тусем хушшинчен хӗвел тухать, унтах вертолет вӗҫет.

Залра ларма-тӑма вырӑн ҫук. Кунта Трак енрен асӑннӑ ҫӗр-шывра интернационалла тивӗҫе пурнӑҫланисем, шкулсенчен районти слета килнӗ ҫамрӑк армеецсем.

Уява район администрацийӗн культура, слорт, ҫамрӑксен ӗҫӗсен пайӗн пуҫлӑхӗ А. Лебедев уҫать. Кӗҫех па­раппан сассисем янараса каяҫҫӗ. 1941—1945 ҫулсенчи Аслӑ Отечественнӑй вӑрҫӑри Ҫӗнтерӳ' ялавне илсе кӗреҫҫӗ. Раҫҫейӗн, Чӑваш Республикин, Трак енӗн Гимнӗсем янӑраҫҫӗ.

Район администрацийӗн социаллӑ хÿтлӗх пайӗн ертÿҫи Л. Киселев сӑмах илет. "Вӑхӑт шӑвать, акӑ пирӗн сар-сене Афганистанран илсе тухнӑранпа 21 ҫул ҫитрӗ. Эсир унта ҫӗр-шыв умӗнчи таса тивӗҫе пурнӑҫларар. Анчах хакла кайса ларчӗ вӑл вӑрҫӑ пире. 18—20 ҫулсенчи сывӑ та тӗреклӗ, патвар каччӑсене ҫухатрӑмӑр эпир. Хамӑр районти В. Кацовпа В. Степанов та ҫав ҫапӑҫусенче вилмеллех аманчӗҫ. Эсир тӑтӑшах шкулсенче пулатӑр, вӗренекенсене хӑвӑрӑн служба кунӗсем пирки каласа паратӑр. Сире сывлӑх пултӑр", — терӗ Леонид Аркадьевич.

Районти вӗренту пайӗн пуҫлӑхӗн ҫумӗ М. Голубев паттӑр салтаксен ячёпе чылай ӑшӑ сӑмахсем каларӗ.

В. Макаров ҫурта ҫутать. Унтан Афганистанра, Ҫурҫӗр Кавказра, ытти хӗрӳ точкӑсенче вӑхӑтсӑр пуҫ хунисе-не асӑнса пӗр минут шӑп тӑчӗҫ. Упи вӑтам шкулӗнче вӗренекенсемпе афганецсен ушкӑнӗ Красноармейскинче Тӑван ҫӗр-шывӑн Аслӑ вӑрҫинче пуҫ хунӑ ентеш-салтаксене асӑнса лартнӑ палӑк патне чечек кӑшӑлӗ хучӗҫ.
Ун хыҫҫӑн шкулсенчи ҫамрӑк армеецсен отделенийӗсен районти слечӗ пуҫланчӗ. Конкурссене Алманч, Мӑн Шетмӗ, Карай, Упи, Еншик Чуллӑ, райцентрти иккӗмӗш шкулсенче, Трак гимназийӗнче вёренекенсем" хутшӑнчӗҫ. Отделени командирӗсем хӑйсем тупӑшӑва хатӗрри ҫинчен Афганистан ветеранӗсен канашӗн ЧР организацийӗн  районти уйрӑмӗн председательне А.Терентьёва хыпарларӗҫ. Чи малтан ҫамрӑк армеецсем "Яштак та кӗрнеклӗ" тупӑшу-ра вӑй виҫрӗҫ. Вӗсен сцена ҫинче стройпа утмалла, командир паракан мӗн пур заданисене пурнӑҫламалла. Унтан вӗсем автомат сÿтсе пухассипе хӑйсен пултарулӑхне кӑтартрӗҫ. Жюри тивӗҫлипе хакларӗ вӗсен ӗҫне. Ҫивӗч кӗрешӳре райцентрти иккӗмӗш шкул вӗренекенӗсем ҫӗнтерчӗҫ. Вӗсем диплома тата ятарлӑ приза тивӗҫрӗҫ. Еншик Чуллӑпа Мӑн Шетмӗ шкулӗсенчи ҫамрӑк армеецсем — иккӗмӗшпе виҫҫӗмӗш вырӑнсенче.

Епле уяв-ха вӑл юрӑ-ташӑсӑр? Куракансене "За-волжский" клуб ҫумӗнчи "Раштав" ансамбль (ертӳҫи — А. Тюмеров), районти ис-кусство шкулӗн вӗренекенӗсем, Шупашкара Индинчен вёренме килнӗ Дипендра Мани юрӑҫ саламларĕҫ.