Юпа уйăхĕн 20-мĕшĕнче район администрацийĕн çурчĕн ларусен залĕнче район депутачĕсен пиллĕкмĕш суйлаври Пухăвĕн депутачĕсен организацилле пĕрремĕш ларăвĕ иртрĕ. Унта район депутачĕсен тăваттăмĕш тата пиллĕкмĕш суйлавсенчи Пухăвĕсен депутачĕсем, ял тăрăхĕсен унччен ĕçленĕ тата çĕнĕрен суйланă пуçлăхĕсем, район центрĕнчи предприятисемпе организацисен тата учрежденисен ертÿçисем хутшăнчĕç. 
Ларăва çулĕсемпе чи аслă депутат Ю. А. Ильин (11-мĕш Кĕçĕн Шетмĕ суйлав округĕ) уçрĕ. Район Гимнĕ залра мăнаçлăн янăранă хыççăн Красноармейски территори суйлав комиссийĕн председательне В. Ю. Иванова сăмах пачĕç. Валерий Юрьевич 2010 çулхи юпа уйăхĕн 10-мĕшĕнче район депутачĕсен пиллĕкмĕш суйлаври Пухăвĕн депутачĕсене суйланин итогĕсемпе паллаштарчĕ. Пурĕ 19 депутат суйланнă, 15-шĕ — "Единая Россия” партирен, 1 — РФ КП, 3-шĕ — хăйсене хăйсем тăратнăскерсем. 6-шĕ район депутачĕсен тăваттăмĕш суйлаври Пухăвĕн депутачĕсем пулнă. Депутатсем хушшинче 6 хĕрарăм. Депутатсен вăтам çулĕ 44,5-пе танлашать. В. Ю. Иванов çĕнĕрен суйланнă депутатсене вăхăтлăх удостоверенисем пачĕ. Район администрацийĕн пуçлăхĕ В. В. Александров ларура район депутачĕсен тăваттăмĕш суйлаври Пухăвĕн депутачĕсене тата 6 ял тăрăхĕн унччен ĕçленĕ пуçлăхĕсене — А. И. Федорова (Мăн Шетмĕ), О. В. Андреевана (Кĕçĕн Шетмĕ), Л. П. Андрианована (Карай), В. К. Шестакова (Красноармейски), В. Я. Григорьева (Упи) тата А. П. Фролована (Еншик Чуллă) ăшшăн тав турĕ, Тав хучĕсемпе чысларĕ.
Кун йĕркине çирĕплетнĕ хыççăн депутатсем ыйтусене пăхса тухма тытăнчĕç. Вĕсем Красноармейски район пуçлăхĕ — район депутачĕсен пиллĕкмĕш суйлаври Пухăвĕн председателĕ пулма пĕр саслăн В. Н. Григорьев депутата (5-мĕш Заволжски суйлав округĕ) суйларĕç, район депутачĕсен Пухăвĕн председателĕн çумĕ пулма вара С. П. Иванова (12-мĕш Яманак суйлав округĕ) шанчĕç. Депутатсем çавăн пекех ялан ĕçлекен секретариат суйларĕç, яланхи виçĕ комисси (экономика ĕçĕ-хĕлĕн, бюджет, финанссем, налуксемпе тÿлевсен; саккунлăха, право йĕркине çирĕплетессин, вырăнти хăй тытăмлăха аталантарассин тата депутат этикин; социаллă политика, сывлăха сыхлассин, культура, вĕрентÿ тата халăх ыйтăвĕсене тивĕçтерессин ыйтăвĕсемпе) тата ревизи комиссийĕн йышĕсене çирĕплетрĕç, район депутачĕсен пиллĕкмĕш суйлаври Пухăвĕнчи "Единая Россия” депутат ушкăнне туса хучĕç, ертÿçи — А. В. Шестаков депутат (2-мĕш Красноармейски суйлав округĕ).
Ларăва Чăваш Республикин юстици министрĕ Н. В. Прокопьева хутшăнчĕ, пухăннисене 2010 çулхи юпа уйăхĕн 10-мĕшĕнчи суйлава ирттерме активлă хутшăннăшăн ăшшăн тав турĕ, В. Н. Григорьева вара яваплă должноçа суйланă ятпа саламларĕ.

В.Данилов