Юпа уйăхĕн 21-мĕшĕнче пирĕн районта Чăваш Республикин культура, национальноçсен ĕçĕсен, информаци политикин тата архив ĕçĕн министерствин кунĕ иртрĕ. 

Унта хутшăнма Трак ене министр çумĕ Т. В. Казакова ертсе пыракан 12 çынран тăракан ĕç ушкăнĕ килчĕ. Министерство кунне килнисем, пĕчĕкрех ушкăнсене уйрăлса, Алманч, Кĕçĕн Шетмĕ, Красноармейски ял тăрăхĕсенчи культура обăекчĕсене çитсе курчĕç. Тĕслĕхрен, вĕсем муниципаллă архивра документсене мĕнле шута илнипе тата упранипе, Красноармейскинчи ачасен искусство шкулĕнче вĕрентÿ процесне йĕркеленипе тата лицензи илме документсем хатĕрленипе, халăх пултарулăхĕн районти çуртĕнче, çавăн пекех Кĕçĕн Шетмĕри Э. М. Юрьев ячĕллĕ музейра — ÿкерчĕксен галерейинче юсав ĕçĕсене еплерех йĕркеленипе, районти ял тăрăхĕсем хушшинчи тĕп библиотекăра халăха кĕнекесемпе тивĕçтерессипе мĕнле ĕçленипе паллашрĕç. Кунпа пĕрлех министерство кунне килнисем вĕсенчи нормативлă актсене, ĕç хучĕсемпе плансене тишкерчĕç, культура учрежденийĕсенче тимлекенсене методика пулăшăвĕ кÿчĕç.

Кăнтăрла иртсен министерство кунĕн итогĕсене район администрацийĕн çурчĕн акт залĕнче пулнă анлă ларура (унта районти культура учрежденийĕсенче вăй хуракансемпе пĕрлех ял тăрăхĕсен пуçлăхĕсем те хутшăнчĕç) пĕтĕмлетрĕç. Пухăннисем умĕнче министр çумĕ Т. В. Казакова, район администрацийĕн пуçлăхĕ В. В. Александров, ыттисем сăмах каларĕç, министерство кунĕ икĕ енĕшĕн те усăллă тата ĕçлĕ лару-тăрура иртнине палăртрĕç.