Григорий Алексеевич Алексеев (10.12.1921, Çĕньял Чуракасси) — инженер, техника наукисен докторĕ, профессор (1983). 
Г.А.Алексеев Тăван çĕр-шывăн 1941—1945 çулсенчи Аслă вăрçине хутшăннă. Мускаври полиграфи институтĕнчен (1940) вĕренсе тухнă. 1946 çултанпа полиграфипе полиграфи машинисем тăвакан отрасльте ĕçленĕ: Коми АССРĕнчи республика типографийĕн директорĕ тата тĕп инженерĕ (1946—51), Карелипе Финлянди ССРĕн типографи директорĕ (1951—54), Рыбинск хулинчи "Проммаш” наукăпа тĕпчев институчĕн наукăпа тĕпчев филиалĕн начальникĕ (1954—1967); 1968 çултан пуçласа 1976 çулччен Рыбинскри авиаци технологи институчĕн материалсен сопротивленийĕн кафедрин пуçлăхĕ. 1981 çулта "Сăрлакан аппаратсен расчетпа проектлассин теорийĕ” темăпа доктор диссертацине хÿтĕленĕ. 1987 çултан пуçласа 1996 çулччен Чăваш патшалăх университечĕн материалсен сопротивленийĕ тата строительство механики кафедринче профессорта ĕçленĕ. Автоматла типографи туса хурассипе çыхăннă ыйтăва тĕпченĕ; кăткăс условисенче пĕчĕк форматлă хаçатсем тата листовкăсем пичетлемелли пĕчĕк калăпăшлă çăмăл конструкциллĕ пичет автоматне тунă. Япаласен механика шайĕнчи çĕнĕ деформаци тата конструкцисен шанчăклăхĕн концепцине тупса палăртнă. Чылай наука ĕçĕн, вăл шутра монографисен, авторĕ.