П. Е. Егоров 1919 ҫулхи чук уйăхӗн 17-мӗшӗнче хамӑр районти Пайсупин ялӗнче ҫуралнӑ. Асамлӑ вырӑн тейӗн ҫак яла. Кунтах унӑн шӑллӗ — Владимир Харитонов — поэт, прозаик ҫӗр ҫине килнӗ. Вӑл 50 ытла сӑвва юрра хывнӑ, чылай кӗнеке пичетлесе кӑларнӑ.

П. Егоров ялти пуҫламӑш шкул хыҫҫӑн малалла пӗлӗве Упи шкулӗнче ӳстернӗ. Ун чухне икӗ ял хушшинчи çул такӑр та асфальтлӑ пулман ҫав. Мӑн Ҫавал шывӗ те тулӑх тӑнӑ. Вӑхӑтлӑх кӗпер урлӑ кӑна каҫса ҫӳренӗ. Ҫавна май шкула килекен ачасене юхан шыв урлӑ кимӗпе каҫарнӑ. Проза ӑсти ҫак тапхӑра "Каникул иртсен" калавра ӑнӑҫпӑ ҫырса кӑтартнӑ. Вӗренекенсем хӑш-пӗр чухне шыва кӗрсе ӳкнине пула уроксене килмен тӗслӗхсем те пулнӑ. Порфирий Егорович нумай ҫул хушши учительте ӗҫленӗрен (вӑл пирӗн районти Яманак, Упи, Вӑрнар районӗнчи Упнер шкулӗсенче тӑрӑшнӑ) ачасем валли те илемлӗ калавсем ӑста "калӑпланӑ". "Йӗр тӑрӑх", "Кучченеҫ", "Ҫамрӑк партизан" кӗнекесене кӗҫӗннисем юратсах вулаҫҫӗ.

Шӳт-кулӑш жанрӗпе те ӑста пулнӑ Пурхиле (ашшӗпе амӑшӗ ӑна сапла чӗннӗ). Малтанхи калавӑн ячӗ те ҫавнах ҫирӗплетет: "Хаплашки хаплаштарать". Каярахпа ку йышши калавсен пуххисем уйрӑм кӗнекесемпе те тухнӑ: "Сӑхман ҫинчи саплӑк", 'Тип мунча", "Автан ҫиетпӗр арӑмпа" (3 авторпа).