Вениамин Васильевич Агатьев (18.9.1943, Яманак ялĕ) — производство йĕркелÿçи, экономика наукисен докторĕ. 
Урал вăрман техника институтĕнчен (1968, Свердловск), СССР Министрсен Совечĕ çумĕнчи халăх хуçалăх академийĕнчен (1989) вĕренсе тухнă. 1968 çултанпа — Свердловск облаçĕнчи чылай вăрман промышленность хуçалăхĕсен техника ертÿçи, вăрман пункчĕн начальникĕ, производство пайĕн пуçлăхĕ, директор пуçлăхĕн çумĕ, тĕп инженерĕ, директорĕ; 1978—83 — "Полевсклес” производство пĕрлешĕвĕн тĕп инженерĕ, генеральнăй директорĕ; 1983—87 — СССР çăмăл промышленноç министерствин "Тагиллес” производство пĕрлешĕвĕн генеральнăй директорĕ; 1989—91 — СССР Вăрман промышленность министерствин Вăрман хатĕрлекен тĕп управленийĕн начальникĕн çумĕ. 1992 çултан пуçласа 1994 çулччен "Лескомцентр” предприятин (Мускав) генеральнăй директорĕн пĕрремĕш çумĕ, 1997—99 — "Рослеспром” Раççей патшалăх вăрман промышленноçĕн компанийĕн председателĕн пĕрремĕш çумĕ. 1999—2002 "Сокол-лес” фирмăна ертсе пынă, унтан "Сокол-лес”, "Межалеспром”, "Меркурий-лес” фирмăсен генеральнăй директорĕ. Агатьев — çут çанталăк пуянлăхĕсемпе перекетлĕ усă курас ыйтусемпе нумай наука ĕçĕн авторĕ. 
Раççей Федерацийĕн вăрман промышленноçĕн тава тивĕçлĕ ĕçченĕ (1999). Ĕçлĕх Хĕрлĕ Ялав, "Хисеп палли” орденсемпе наградăланă.